1937/2023-2024

Khawzawl, 19th September 2023: Vawiin khan Khawzawl DC Conference Hall-ah Khawzawl DC Office Building thar leh a kawta Khawzawl District Lungphun hawn dan tur relin thutkhawmna neih a ni a. He hun hi Khawzawl DC Pu K. Lalrohlua chuan a kaihruai a, sawrkar mi pawimawhte bakah tlawmngai pawl hruaitute an tel a ni.

Khawzawl DC Pu K. Lalrohlua chuan DC Office Building thar leh District Lungphun hawn chu Khawzawl District tana hun chhinchhiahthlak tak a nih angin, kokim leh ropui taka hman tha a tih thu a sawi a. Addl DC Pu Lalfakzuala leh Lungphun Sub- Committee member Pu B. Vanlalbiakzara te hnen atangin Lungphun chungchanga hmalak tawhna hrang hrang report tawi ngaihthlak a ni bawk.

Khawzawl DC Office Building thar leh District Lungphun hi October ni 2, 2023-a hawn tur a ruahman a ni a. Deputy Chief Minister, 22-Tuichang AC bialtu ni bawk Pu Tawnluia chu khuallian ni tura beisei a ni.