1938/2023-2024

Vawiin khan School Education Minister Pu Lalchhandama Ralte chuan Govt Middle School Sakawrdai Golden Jubilee lawmna Sakawrdai Middle School tualzawla neih chu a hmanpui.

Minister chuan Sakawrdai Middle School Golden Jubilee lawmnaah hian thusawiin zirna ngaisang apiang khaw hmasawn an ni a ti a. Zirna hian khawtlang nunah a lailum a luah a ngai a, he jubilee hian zirna hi mihring inchherna hmunpui a ni a, naupang sei lian hian rahbi dik an rah a ngai tih min hrilh hretuah ṭang se a duh thu a sawi a ni.

Pu Lalchhandama Ralte chuan zirtirtu hna hi missionary hna a ni a, mihring chhernaa mistiri an nih avangin hmangaihna nena thawk turin a fuih a, naupang chak lo leh uaifual deuhte dawmkan hna hi thawhrim hret a ngai a nih pawha ngai pawimawh zual turin a chah bawk. Mizorama mi hlawhtlingte hi thingtlang aṭanga chhuak tam tak an awm tih sawiin taimakna, huaisenna leh tumruhna nena an zir phawt chuan fa hrin manhla an ni thei tih hre turin zirlaite a fuih bawk.

Minister chuan hmar thimpui zangkhaw bungbut hnan tia miten an sawi ṭhin chu tieng turin sorkarin hmasawnna chi hrang hrang a thawk mek a, hengte hi mipuiten a hlawkna an tel mek a ni tiin zirna, hriselna leh inkalpawhna lama hmasawnna hnathawh te a sawi bawk.

Minister hian Govt Middle School Sakawrdai Golden Jubilee lungphun a hawng a, Souvenir a tlangzarh nghal bawk.

Govt Middle School Sakawrdai hi kum 1973 khan din a ni a,  Golden Jubilee lawmnaah hian Shinlung Hills Council hotute,  Sakawrdai khawtlang hruaitute, tlawmngai pawl hruaitute, he sikula lo thawk tawh leh zir chhuak te, tuna zirlai leh zirtirtute an tel a ni.