FCS&CA MINISTER Pu K Lalrinliana chuan vawiin khan Bairabi Rail Junction bula tuialhthei dah khawlna tur hmun ruahman chu Sawrkar Official te nen an tlawh.

Minister hi FCS&CA Commissioner Secretary Pu Rochungnunga,  Railway Consultant to the Government of Mizoram Pu Hrangtawna, FCS&CA Dy. Director Pu Robert C Lalhmangaiha, North East Frontier Railways Executive Engineer Satish Jyoti, NFR Inspector of Works Akash Kumar leh Bimal Das te bakah Sawrkar Official hrang hrang ten an tawiawm a, helai hmunhma hi zirchiangin hmalak dan tur an sawiho a ni. Tuialhthei dahna tur hmun ruahman hi 1,56,000 sq.ft vela zau niin ruahmanna anga thil a kal chuan helai hmunah hian rel/train in tuialhthei rawn phur lut in dah khawl ani anga, oil depot atang hian mizoram chhunga hmun hrang hrangah sem chhuah leh thin ani ang. He huna tel ve North East Frontier Railways a Executive Engineer Satish Jyoti chuan Google atangin a hmunhma zirchiang in Rel/Train luh na tur te zirchiangin report a thehlut anga, Sawrkar lam aiawh a kal ten Indian Oil Corporation ah a tul angin an lo bawhzui dawn bawk a ni. Bairabi Rail Junction bula Oil Depot ruahman hi hlawhtling taka kalpui theih anih chuan Mizoram in Oil lama harsatna kan tawh thin chu nasa taka a tih ziaawm beisei a ni.

Minister hian Bairabi Helipad Vênga Supply Department Buhfai dah khawlna hmuna chhuat tla hniam bakah buhfai thiar luh leh thiar chhuahna kawngkapui thawm that ngai lai te enchiangin hmalak dan tur chu FCS&CA Official ho nen an sawiho bawk a, hemi bakah hian Rail Crossing bula FCI Godown Bairabi bypass road chu thawm that dan tur zirchiangin a tlawh bawk. Minister leh a Team te hian an thil hmuh leh zirna report te chu State Sawrkar ah thlenin hmalak dan tur ruahmanna awm thei te an la sawiho leh dawn a ni.