Vawiin khan Mizoram State Higher Education Council Chairman leh H&TE Minister ni bawk Dr.R.Lalthangliana hovin Mizoram State Higher Education Council (MSHEC) Meeting vawi 8-na chu Directorate of Higher & Technical Education Conference Hall, McDonald Hill-ah neih a ni a. He meeting-ah hian MSHEC Vice-Chairman leh H&TE Commissioner/Secretary ni bawk Pu Biaktluanga bakah MSHEC Member-Secretary Pu Thanglura, H&TE Director Pu R.Kesavan, Council Member-te leh mithiam sawm bikte pawh an tel.

MSHEC Chairman H&TE Minister Dr.R.Lalthangliana chuan Council Member kalkhawmte lawmin an hmalakna tawhah a fak a. Sorkar laipuiin ramchhunga zirna sang zawk (higher education) tihhmasawn leh tihchangtlun nana Rashtriya Uchchatar Shiksha Abhiyan (RUSA) a ruahman chu Mizorama zirna sang zawk pawhin a tangkaipui hlea a hriat thu a sawi a. Ram dangte um phak hmasawnna nei tura thil pawimawh ber zingah Zirna hi a tel a ni tiin Minister chuan College-a awm ngei ngei tura ngaih department awm lohna College-ah te engtia hmalak tur nge tih ngaihtuahho a pawimawha a hriat thu a sawi bawk. Mizoram chu ziak leh chhiar thiamah ramchhungah dinhmun 2-na hauh mahse quality education leh human resource development-ah tanlak a la ngai hle a ni, a ti. RUSA hnuaia hmalakna hrang hrangte thlirnaah College leh zirna in dangte Mizoram chhungah a rawn pungin a thang chho zel a, heng hmunah te hian administrative leh academic building-te bakah zirtirtute leh staff-te chenna tur residential quarter changtlun tak thlengin project-ah tel theih nise tih rawtna a siam a; a bik takin ram pawna atanga Mizoram College leh zirna ina thawk tura rawihte tan Mizoram chhungah rawn thawk a tichakawm zawk a rin thu Minister chuan a sawi.

MSHEC Vice-Chairman Pu Biaktluanga pawhin thusawiin Mizoram chhunga zirna sang zawk hmasawnna tur ngaihtuah em em Minister an neih chu lawmawm a tih thu a sawi a, vawiina Meeting pawh hi Minister-in koh tura a tih angin zirna hmasawnna zel dan tur sawiho turin leh an hmalak tawhna hrang hrangte thlirho turin an thukhawm a ni, a ti.

He Council meeting-ah hian MSHEC Member-Secretary Pu Thanglura chuan report pein, Council meeting hmasaa lo rel tawh leh hmalakna hrang hrangte a tarlang a. Chung hmachhawp zingah chuan Mizoram College thlan bik 6-ah Post Graduate Course Department thlan bikah te kum 2019-2020 Academic Session atanga hawn tura hmachhawp mekte sawiho nghal a ni a. Hei hi UGC-NAAC Inspection-in rawtna a lo siam tawhte tihhlawhtlinna tura Council-in a hmalakna a ni.

Report a pek zelnaah, RUSA suma Mizoram Engineering College hmasa ber tur Pukpui, Lunglei-a sak peih tawh chu sorkar laipui duhdan anga kum 2019-2020 Academic Session atanga engineering class hawn dan turte pawh Council hian a rel nghal a ni. MSHEC-ah hian RUSA Phase-I (2015-2018) hnuaia College hrang hranga ‘Infrastructure Grants leh Equity Initiatives’ hnuaia sum pek leh a hmanna-te report chipchiar tak pek niin sawihona neih zui a ni a. Tin, RUSA Phase-2 (2018-2020) hnuaia College 17-hnena cheng vaibelchhe 42 sum hmuhna tur leh a hmanna tura ruahmannate pawh sawiho a ni. RUSA Scheme hnuaia Assistant Professor 72 MPSC kaltlanga lak tura hmachhawpte tihhlawhtlin a nih thuai theihna turte sawiho a ni bawk a. College hrang hranga infrastructure development, upgradation leh equipment thar mamawhna leh hmalak dan turte Council meeting-ah hian sawiho nghal a ni.

Sorkar laipuia Ministry of HRD leh UGC te duhdan anga College zawng zawngin NAAC Accredited Status-a hlankai vek a, UGC Regulations anga College zawng zawngin Higher Education-ah zirna tha zawk (quality zawk) a neih dan tur - Broad based scheme-te pawh MSHEC hian a duangchhuak tawh bawk a ni. India rama state dangte rualin Mizoram-ah Higher Education zirna hian chak taka hma a sawn theihna turin Council hian rawtna hrang hrangte a siam thin a ni.