Kum 1966, March ni 5-a India sawrkar in Aizawl a bomb hriatrengna hun Mizo Zirlai Pawl (MZP) buatsaih, Zoram Ni chu vawiin khan Dawrpui Mutlipurpose Centre, Aizawl ah hman  ani a. He hun pawimawh tak hi Home Minister Pu Lalchamliana chuan khuallian niin a hmanpui a ni.

Home Minister Pu Lalchamliana chuan Mizo thalaite zinga Mizo Nationalism a rawn par chhuak leh chu lawmawm a tih thu a sawi a.  Kal khawmte hnenah thu sawiin Mizo nih chu a zahthlak a hnehin inchhuanna tur zawk a ni tih a sawi a. Amaherawh chu,  hnamdang te sit lova hma lam pan tur kan ni a ti. Nationalism rilru pua thalai zirlai te chu lehkha an zirnaah taima taka zira, intodelh turin a chah bawk a ni.

Home Minister Pu Lalchamliana hian Zoram Ni hman nih dawn tirh khan inhnialna tam tak a awm thu sawi chhuakin Indian Airforce thlawhtheihna in Aizawl a rawn bomb lo ti pawl an awm a, chung mite chuan thudik an sawi lo a ni a ti. "India sawrkar in Aizawl a bomb kha mit ngeiin ka hmu", tiin
amah  ngei pawh mita  hmutu te zingah a tel thu a sawi a. MNF te kha Mizo mipuite tan an rammu a, Mizo mipui te tan bawk remna an siam leh a ni a ti.

Vawiin a Zoram Ni hmanna hian MZP President Pu L.Ramdinliana Renthlei leh MZP Adviser Pu Lalnuntawma Fanai te pawn thu  an sawi a ni.