FCS&CA Minister Pu K. Lalrinliana chuan  Government kolasib College zirlai graduate thar chawimawina hun leh zir thar tur te lawmluhna hun chu vawiin khan kolasib Diakkawn YMA Hall ah a hmanpui.

Khuallian chuan zirlai graduate thar te a lawmpui thu a sawi a, zirlai lut thar tur te pawh lawmna chibai bukin Govt. Kolasib College tana ni chhinchhiah tlak a hmanpui thei chu mimal tak pawha a ngaihhlut thu tarlangin Zirlai titha te thawhrimna bakah zirtirtu te inpekna chu a fakawm in a chhinchhiah tlak hle ani a ti bawk. Minister chuan zirlai kalkhawm te chu fuihin, zirna kawng chu tum mumal tak nei chunga awmze neia zawh a ngai ani a ti a, Mizoram chu buh leh bal bakah thil chi hrang hrang ah ala intodelh loh thu tarlangin kan Ram intodelh lohna chhan te ngaituaha Ram leh Hnam intodelh nan an zirna leh thiamna te chu hmang tangkai se, Pathian ina talent a pek chu a tipung zawng leh Ram tan hmasawnna a nih theihnan ngaituah na seng turin a chah bawk a ni. 

Pu K. Lalrinliana chuan Govt. Kolasib College (GKC) in Science block a hrana an neih theihnan bakah commerce zirna tur a awn theihnan te theihtawp chhuaha hma a lak mek thu tarlangin GKC hall sak nan MLA fund cheng nuai 10 a hlan bawk a ni.

He huna khualzahawm Bawrhsap Pu Zoengsanga chuan kolasib College zirlai te chu tihtak zeta lehkha zir turin a fuih a, an zirna te chuan ram leh hnam hmasawnna kawnga tangkaina a neih theihnan ngaituahna seng turin a chah a. Kan chhungkaw dinhmun leh lakluh mila khawsak ngam a ngai ani tiin nu leh pa te thawh chhuah sa ring chunga khawsak lo tih san ve vak chu a finthlak ber lemloa intodelh tum rana lehkha zirin 'Ram leh Hnam tan enge ka tih theih?' tih hi inzawh fo a pawimawh a, mahni zirlai nunpui tum theuh turin zirlai kalkhawm te a chah a ni. 

Govt. Kolasib College Principal Dr. C. Lalmuankima chuan zirlai pass/graduate thar te fuihna hun hmangin puitling nun mahni kut kea ding tura inpuahchah hun an zawh chho dawn a, engkimah Pathian hre reng turin a chah. Hna zawnna kawngah taima taka ke pen a, khawtlang thil tih a inhmanna ah chin tawk nei turin a chah a, zu, ruihhlo leh nupui pasal neih hmaa sex laka inthiarfihlim tura chah bawkin Pathian rawn reng chunga nun puitling leh nun hlawhtling nei turin duhsakna a hlan bawk a ni.

He hunah hian zirlai graduate thar 73 chawimawi niin mipa 26 leh hmeichhia 47 an ni a, zirlai tihtha zual 10 hnenah incentive cash award hlan niin tun academic session a tan admission la thar zirlai 190 vel an awm a ni.