Mizoram chhunga film siamchhuah kawnga hmasawnna hrang hrang a awm theihna tura inzirtirna leh training nileng awh chu vawiin khan I&PR Auditorium-ah Mizoram Film & Television Producers Guild bultuma buatsaih a ni a, training hi I&PR Director Pu Jim K. Chozah chuan a hawng a ni.

Hawnna thuchah a sawiah I&PR Director chuan tunlai khawvel hmasawnna chak takah hian film hi media tangkai leh thawh hlawk tak a nih tawh avangin mipui mimirte hnena zirtirna tha leh tangkai pechhuak thei turin film buatsaihtute an pawimawh ta hle a ni, a ti. Mizoram sorkar pawhin film lama hmasawnna a awm theih beiseiin anmahni pual hian budget-ah cheng nuai 10 a bithliah tak thute, he sum tlemte hmanga bultanna tura I&PR Department-in hmachhawp hrang hrang a neih mekte a tarlang a. Cable TV Regulation dan dinglai anga Censorship Board din tum a nih dan te, film lama tui mite Society a kalpui leh dan leh hrai mumal tak duante chu peihfel tep a nih thu te sawiin Pu Jim K. Chozah chuan State hmasawn zawka Film Production an kalpui dan zir tur intirhchhuah emaw Mizoram chhung ngeia chutiang mithiam chahluh dan emaw chu hmalak tum dan a nih thu a sawilang bawk. Kawng engkimah thawhhona tha leh sorkar nena rilru inpawh taka kal thiam chu hlawhtlinna bul a ni ang, Pu Jim K Chozah chuan a ti bawk.

Vawiin inkhawm MFTPG Sr. Vice President  Pu Aldrin Zosangliana kaihhruaiah hian MFTPG Patron Pu Lalsawmliana Pachuau chuan film siamchhuah kawnga hriattur tul hmasa leh hmalak dan tur tlangpui a zirtir a. MFTPG General Secretary Pu C Hmingthangvunga’n report pe in an President Pu Lalawmpuia Khiangte chuan thu a sawi bawk a ni.