Ni hnih chhung awh tur, Hmarchhak bial huapa a vawikhatna atan hmeichhe condom hman chungchang zirhona leh training ‘Traning on Female Condom’ tih chu vawiin atang khan Tourist Lodge, Chaltlang-ah tan a ni a. Training hi United Nations Population Fund (UNFPA) leh Population Services International India (PSI) te nen tangkawp in United Nations Office on Drugs and Crime (UNODC) chuan a buatsaih a ni.  

Training ah hian Pu Ravi Bhatnagar, Senior Manager (Programs) PSI chu resource person a ni a. India hmar chhakah hian hmeichhia te zingah ruihtheih thil chauh ni lovin, mipat hmeichhiat hman khawlohna a hluar hle tih zir chhian a ni a. Hmun tam takah mipa ten venhimna tel lova mipat hmeichhiatna an hmanpui luih thin avangin HIV/AIDS, STI/STD leh natna hrang hrang kaihdarh thin a ni a. Chuvangin hmeichhia ten an mahni a an in ven theihna turin hmeichhia condom hi siam/pho lan a ni thu Pu Ravi Bhatnagar chuan a sawi.  Pi Betty Lalthantluangi, Joint Director (Targetted Intervention) MSACS chuan AIDS/HIV, a bikin hmeichhia ten an vei dan leh an dinhmun a tarlang a. UNODC lam tangin Pi Lalhlupuii Sailo, Project Officer pawhin hun hmang bawk a ni.

Training-ah hian UNODC in Hmarchhak biala ruihtheih thil a inchiu thin hmeichhiate puala project ‘Female Injecting Drugs User Project in North East’ hnuaia state pali a NGO an thawhpui te aiawh an tel a. Heng NGO te hi Mizoram ah Agape FIDC; Nagaland ah Bethesda; Manipur ah Nirvana leh Meghalaya ah VHAM te an ni. Hmeichhe condom hi he training zawhfel hnu hian UNODC thawhpui NGO office ah te man tlawmte (pakhat Rs. 2.50) in a lei thei dawn a ni.