Chief Minister Pu Lal Thanhawla chuan ‘sorkar hnathawhna a mipui tawiawmna tha nei tur chuan official ten an zir angai a, awm dan mawi an neih a tul a ni’, a ti. He thu hi vawiina Lunglei Agriculture Complex a Agriculture Rest House cum Conference Hall-a a hawnna a a sawi a ni.

Chief Minister chuan sorkar hnathawk officer zin thinte tana thlenna nuam tak, Lunglei High Power Committee (HPC)  sum hmanga Agriculture Rest House tha tak sak a ni chu a lawmawm hle a ni a ti a. Mizoram chhim lam hi Independence hmalam chuan kan chhuahka ber a ni thin tiin, hun lo inher danglam zelah a pawimawhna thin te a in thlakthleng a.Chuvangin hnuchhawn ram anga inngaihna te alo awm a. Chhintuipui chhungah chuan mahni inrelbawlna, dictrict coucil te an nei a, Lunglei erawhchu hmasawnnain a thlawhkan a ni a ti a. Chuvangin hnuchhawm ram anga inngaihna hi tibo tur leh chak zawka hmasawnna Lunglei districtin a neih theih nan  Lunglei HPC hi din a ni a ti a. Tunah chuan budget hrang neiin chak takin hmasawnna kalpui mek a ni a ti. Sum an neih ang angin department hrang hrangte nen tan an la tlang a, a lawmawm hle a ni Chief Minister chuan a ti.

Lunglei HPC ang hi MLA dangte pawhin an awh ve avangin district council te tiam lovin district 4 ah Planning Committee dinin Rs.1 Crore theuh ruahman sak anih thu Chief Minister chuan a sawi a. HPC kalphung entawn chunga district neitu ten tha an tih anga kalpui tur a ni a ti.

Zirna In sang zawk Mizorama rawn dah tur chungchanga a awmna tur hmun thlan thuah, Chief Minister chuan Mizoram sorkarin thuneihna a neih loh thu sawiin, NIT a ni emaw Horticulture College tur a ni emaw, an awmna tur hi kan lo thlan sak ngawt thei lo a ni a ti a. An kalphungah chuan a thlawnin an inbunna hmun tur acre 300 a zau, thlawhna tumhmun hnai ber atanga darkar 2 aia reilo kalna a ni tur a ni an ti a. Hengte hi neih ve kan duh anih chuan an kalphung ang hi kan zawm ve mai angai a ni a ti. 

Chief Minister chuan Chawngte panna motor kawng chhia chu a hriat thu sawiin, Engineerte pawh alo sawipui tawh a ni a ti a. Hemi chungchangah hian thil awmdan dik tak mipuite hrilh turin Engineerte chu press conference ko turin a rawn a ni a ti. Ram leh hnam humhalh chungchangah Chief Minister chuan kan hmui chauh nilovin kan thinlung leh kan taimakna nen a thawha kan thawh angai a ni a ti. Sorkar tih theih piahlamah hmalak theih dan a ngaihtuah theih a ni a ti.

Khualzahawm Pu Joseph Lalhimpuia, Vice Chairman Lunglei HPC chuan State Plan sum atanga hmasawnna hna thawh remchanglo te chu HPC in Gap Funding hmanga hmalak thin anih thu a sawi a. Lungleia Indian Air Force Radar Station bun tur chungchanga a dodaltu pawlte chuan a hmun ngeia an enfiah hnu ah dodalna chhan tur an hmuh loh thu an sawi chu a sawilang bawk a ni.

Rest House hi HPC Lunglei sum atanga Rs.71.7 Lakhs senga sak a ni a, chhawng thum niin conference hall bakah room 3 leh dormitory khum 5 awmna a awm a ni.

Hawnna inkhawm hi Pu K.S. Thanga, Parliamentary Secretary in a kaihruai a ni.

Rest House hawn hma hian Chief Minister hian Chanmari II a HPC office tur, Rs.154 Lakhs senna tur, chhawng 5 a sak mek chu a en bawk a. NEILIT Lunglei Centre, Pukpuia dinna hmun tur pawh a tlawh nghal a ni.