Sinlung Hills Development Council huam chhunga V/C inthlanna tur chungchangah Home Minister Pu R. Lalzirliana chuan hetiang thuchah a siam :-
Sinlung Hills Development Council huam chhung khaw 15 ah V/C Election nei turin State Election Commission-in October thla chhung atan a buatsaih a. He V/C Election neihna tura mipui ten thlamuang taka inthlan an neih hi Sorkar chuan a duh a. Mipui rorelna democracy zaha a khuaa cheng mipui ten inthlanna thianghlim, mahni duhthlanna ngeia vote thlak vek turin ka ngen a ni.
V/C inthlanna lo awm turah hian HPC’D’ inti ten mipui te vau-in tumahin nomination file lo turin thuchhuah an siam a, nomination file lui te chungah kutthlak tumin vauna an siam a ni tih hi Sorkarin a hria a, pawi a ti hle a ni. HPC’D’ inti ho te pawh hi hetiang democracy process dik tak hmanga mipui rorelna election tibuai lo turin ka ngen a. Rokhawlhna siama mi vaua, election nei thei lo tura an siam a nih chuan a sawhkhawk chu helai area hi rambuaia puan a hring chhuak thei a, Mizoram Police mai ni lo, Central Para Military Force te helaia inzarpharha an awm chuan nunau mipui te tan rambuai thim chhah zawk an cho chhuak thei a ni tih hi hria se la, tumahin rokhawlhna siam lo turin ka ngen a ni.
