I&PR Department leh Mizoram Film Development Society (MFDS) tangkawpa buatsaih ‘Workshop on Skill Development for Film Producers-cum-Actors Training’ kharna chu vawiin khan I&PR Secretary Pu B.Lalthanliana hovin I&PR Auditorium-ah neih a ni.

Workshop kharna inkhawm I&PR Jt. Director Pi Lalnithangi kaihhruaiah hian Khuallian Pu B.Lalthanliana chuan Mizo thalaite tuina leh talent haichhuahna kawngah film industry tihhmasawn hi rahbi pawimawh tak a ni, a ti a. Sorkar hmalakna avangin Mizoram film industry pawh nasa takin a thang zel a, eizawnna atan pawh hmantlak a ni hial tawh nia a hriat thu a sawi. Mahni eizawnna leh hnathawh ngaihhlu apiangte chu midang pawhin an ngaihhlut sak thin a, tunlai khawvelah eizawnna kawng eng pawh thlang ila thiam bikna ‘skill’ neih a tul tawh hle a ni, a ti bawk. I&PR Secretary Pu B.Lalthanliana chuan Lalduhkima Khiangte siam documentary film ‘Phawngpui Tlang’ tih a tlangzarh nghal a ni.

Nodal Officer, Film Development, I&PR Pi Lallianpuii chuan Workshop chungchang Report-ah a tarlan danah he ni 4 awh Workshop-ah hian film producers 15 leh actors 50 chuang an tel a. Workshop neih chhung hian film lama hnuhma ngah tawhte bakah phai lama Film Institute leh National School of Drama-ah pawh training lo nei tawh mithiam bik - Pu Lalsawmliana Pachuau, Dr.Louise Hauhnar, Pu Lalawmpuia Khiangte leh Pu Vanlalhuma - ten film leh a kaihhnawih thil chi hrang hrang an zirtir a. I&PR leh MFDS tangkawp chuan Film lam training hi vawi 2 buatsaih tawh a; Feature film leh Short Film Competition te an lo siam tawh bawk a ni. Feature Film Competition dang nei leh turin hmalak mek a ni bawk.

MFDS President Pu C.Hmingthangvunga pawhin thu sawiin Mizoramah film industry hmasawnna atan sorkarin ruahmanna a siam sak chu a lawmawm hle a ni, a ti a. I&PR Department-in sum awm ang ang thiam taka an hmanpui thin avang leh an kaihhruaina hnuaiah MFDS hmachhawp hrang hrang tihhlawhtlin zel a nih avangin lawmthu a sawi bawk. Training chhimtu zawng zawng, film lama eizawngte chu khawtlang leh mipui zingah pawh hawihawm leh mahni inthunun thiam turin a chah.

Workshop kharna inkhawmah hian training zo film producers leh actors zawng zawngte chu Certificate hlan nghal an ni a. I&PR Jt. Director Pu David L.Thangliana’n lawmthu sawiin hun a khar a ni.