Ni hnih awh tur India hmarchhak state hrang hranga Biotech Hub Coordinators Review Meeting vawi 6-na chu vawiin khan Mizoram University Auditorium ah hawn a ni a. Health Minister Pu Lal Thanzara chu khuallian a ni.
Pu Lal Thanzara chuan sawrkar laipuiin Biotechnology Department kaltlanga India hmarchhak state hrang hranga hma a la chu lawmawm tiin biodiversity a hausa hmarchhak state-ah Biotechnology thiamna hmang hian hmasawnna hna thawh tur hmabak a tam hle a ni, a ti. Health Minister chuan mi nuai 11 awrh chenna Mizorama cancer hluar lutuk ti ziaawm tura Mizoram State Cancer Institute (MSCI)-in cancer beih let hna a thawh mek tichak turin Department of Biotechnology (DBT) - New Delhi in molecular diagnostic laboratory a rawn bunsak chu lawmawm a tih thu a sawi a. MZU, Civil Hospital leh MSCI tangkawpin cancer natna zirchian hna an thawh meka sum mamawhte DBT-in a la pe lehzel chu Mizoram tan malsawmna hlu tak a ni, a ti bawk. Minister chuan Biotech Hub Coordinator hmarchhak state hrang hranga atanga mi 200 dawn kalkhawmte duhsakna hlanin hmar chhak biala leilung hausakna haichhuah loh tam tak la awmte haichhuah pui turin Biotechnology mithiamte a sawm a ni.
Sawrkar laipui Dept. of Biotechnology a Adviser hna thawk mek Dr. T.Madhan Mohan chuan India hmarchhaka an department hmalakna chipchiar takin a tarlang a. Mizoram bikah chuan DBT hian Mizoram University ah State Level Biotech Hub leh Unit of Excellence te, Mizoram Cancer Institute ah Molecular Diagnostic Laboratory te; Selesih Central Agriculture University, Regional Institute of Paramedical and Nursing Sciences, Govt. Zirtiri Residential College leh Pachhunga University College ah Institutional level Biotech hub te an din a. Mizoram chhunga Institution hrang hrangah DBT Twinning Programme kaltlangin Research & Development Project 42 zet kalpui a nih thu leh Mizoram State chhungah a zavai belh khawmin crore 25 hu project kalpui a nih thu te a sawi a ni.
Review Meeting hawnna inkhawmah hian MZU Vice Chancellor Prof.R.Lalthantluanga'n thu sawiin hlawk taka meeting an neih theih nan duhsakna a hlan a. MZU School of Life Sciences a Dean Prof.G.S.Solanki chuan kalkhawmte lawmna thu a sawi a. State Level Biotech Hub Coordinator Prof.N.Senthil Kumar chuan Biotech Hub nih phung a sawifiah a. Co-Coordinator Dr.H.Lalhruaitluanga'n lawmthu sawiin hawnna inkhawm hi tihtawp a ni.
