Vawiin hian National Programme for Prevention and Control of Cancer, Diabetes, Cardiovascular Diseases and Stroke (NPCDCS) chuan a vawi - 3 na atan Review Meeting, I & PR Conference Hall ah hman a ni.

Meeting hi Dr. KK Chhetri, Joint Director, Health & Family Welfare in kaihruaiin, Dr. K. Lalbiakzuala, Director, Hospital and Medical Education cum Mission Director, National Health Mission chu Chief Guest niin, Dr. Rohmingthanga Ralte, Director of Health Services chu Guest of Honour a ni.

He hunah hian Dr. Eric Zomawia, State Nodal Officer (NCD) chuan NPCDCS in tun Financial Year 2015 -16 chhunga hma an lakna hrang hrang te tarlangin Damlo OPD a an en zat hi 77,827 a ni a, Screening Camp ah 7883, a zavaia en zat chu 85,710 a ni. Screening Camp hi vawi 63 lai neih a ni a, Zunthlum leh BP sang hmuhchhuah thar hi 9666 leh 12, 904 a ni bawk. He Programme hnuai ah hian mi 118 lai staff an awm mek bawk.

Dr. K. Lalbiakzuala chuan natna inkaichhawn theih (Communicable Disease) te hi tunlaiah chuan a tlem telh telh a, amaherawhchu natna inkaichhawn theihloh (Non-communicable Disease) te hian san lam a pan nasa a, tunlaia natna kan thihpui tam ber a ni tawh a, chuvang chuan Mizoram mipui te pawh helamah hian kan pianthar a tul hle a ni a ti.

He hunah hian Dr. Loncy V. Lalzarliana, MD, DM Cardiologist chuan Cardiology Dept, Civil Hospital, Aizawla an hmalakna report tawi a pe bawk a, Dr. Saia Chenkual, HOD (Surgery)CHA chuan Breast Cancer, Oral Cancer, Cervical Cancer leh TB Diabetes Screening chungchang te, Dr. Zorengpuii, ENT Surgeon, CHA, leh Dr. Lalruatdiki Chawngthu, State Epidemiologist, NPCDCS ten presentation neiin zir hona hun an hmang bawk a ni.

Hei bakah hian District NCD Clinic Lunglei leh Aizawl, Saiha, Champhai, Mamit, Kolasib atangin District report ngaihthlakna hun an nei a, an harsatna tawh hrang hrangte sawi hoin hmalak zel dan tur sawiho a ni bawk.