Thalaite khawvel siam tura sorkar hmalakna pakhat film siam intihsiakna result chu vawiin chawhnu khan I & PR Auditorium-a inkhawm buatsaihah puan a ni a. Lawmman pakhatna dawngtu Aldrin Zosangliana siam “Hnamchawm Tlangval leh Chhingpuii” chuan sumfai Rs. 1,00,000/- leh thuziak a dawng a, pahnihna Malsawmkima siam “Chengrang Lanu” in Rs. 70,000/- leh thuziak, pathumna “Zualteii te Unau” Dr. Louis Hauhnar siam leh “Darhuai a Hrang” Basanta Meisnam siam ten Rs. 50,000/- ve ve leh thuziak an dawng a. A ti tha zual film 6 te hnenah Rs. 20,000/- leh thuziak hlan an ni a, chung te chu “Ka Palai Asin” Lalzidinga; “Keimah Thanthuama” VL Pianruala; “Khawhring” KC Zoherliana; “Pasaltha” Lalawmpuia Khiangte leh “Thamral” Albert Zosangliana siam te an ni. A tel zawng zawngte hnenah pawh lawmpuina sumfai Rs. 10,000/- theuh leh thuziak pek an ni bawk.

Khuallian Chief Minister Pu Lal Thanhawla chuan thalaite theihna leh thiamna haichhuak tura Film Industry bultan a ni thei ta chu a lawm thu sawiin intodelhna rilru pu chunga rual elna satliah nilova sorkar leh Film Development Society te inkawprem taka kalchhoh zel a pawimawh dawn a ni, a ti a. Sorkar sumpai dinhmun hre rengin tuna bul tanna tura sum ruahmante pawh a la pun zel theih a beisei thu sawiin Chief Minister chuan a innawr zawng ni lovin sum ruahman awm ang ang te dik leh tangkai taka hman thiam a pawimawh zawk dawn a ni, a ti. Hnam nunphung zemawi leh pipu chen atanga rohlu tak tak, a taka lan tir thei film pawimawhzia sawichhuakin Pu Lal Thanhawla chuan khualzin veivakte hipna kawngah pawh thawhhona tha tak a pawimawh dawn a ni, a ti a. Chutihlaiin hnam zia rang hrang hrang pholang zawnga film siam chhuahte chuan dan leh hrai duansa fel tak zawm tur a awm a, film neitu nihna copyright chungchangah te fimkhur taka kal thiam a tul dawn a ni, a ti. Chief Minister chuan Mizo thawnthu behchhana a film siam hi Mizo culture vawnhim nan thil tangkai, thangtharten pipute khawsak dan leh nunphung an hriat phahna, a ni a, thalaite khawvel thar siam tumna kawngah thil tangkai ber te zinga mi a ni, a ti. MFDS leh I&PR Dept. hmalakna hi bultanna dik, a chanve hlawhtlinna hmuh theih nghal ni hiala a hriat thu CM hian a sawilang.

Vawiina result puan leh lawmman semna inkhawmah hian intihsiakna tobul leh a buatsaih dante endik hna leh thurawn hrang hrang neihte chu MFDS Adviser Pu Lalsawmliana Pachuau, he film insiamsiaka Chief Judge chuan a hrilhfiah a. I & PR Director Pu Jim K. Chozah chuan hetiang hun tangkai tak buatsaih kawnga thathawhtu leh mawhphurtute zawng zawng chungah lawmthu a sawi a ni.

Mizoram Film Development Society leh a bultumtu I & PR Department tang dun in an buatsaih film siam kawnga inelna hmasa ber hi May thla chhung khan buatsaih a ni a, hmasang Mizo thawnthu behchhan hmanga short film chan-ah hian pawl hrang hrang 19 an tel a ni.

Tarlan tawh thin angin 2013 - 2014 chhung hian Mizoram sorkar chuan film leh painting lam tih hmasawn nan cheng nuai 10 ve ve a bithliah hran sak a, heng sum ruahman hmang tangkai hian Mizoram Film Development Society leh Mizoram Arts Development Society te chuan anmahni huangchhungah workshop leh seminar te huaihawtin hetiang kawnga thalaite theihna leh phurna cho chhuak turin chak takin hma an la mek a ni.

Tun tum Short Film Competition-ah hian mimal hnenah lawmman engemawzat hlan a ni a, chung te chu: Best Producer/Director : Aldrin Zosangliana - Hnamchawm Tlangval leh Chhingpuii (cheng 5000)

Best Director of Photography: Basanta Meisnam - Darhuai a Hrang (cheng 5000)

Best Script Writer : C Lalchhuanthanga - Di Par Hunah I Tih Kha (cheng 5000)

Best Post Production : Napolean RZ Thanga - Kan Lenna Zotlang Nuam (cheng 5000)

Best Actor : F Lalrochama - Hnamchawm Tlangval leh Chhingpuii (cheng 2000)

Best Supporting Actor : R Lalnunpuia - Chengrang Lanu (cheng 1500)

Best Actress : Annie Duhawmi Zadeng - Di Par Hunah I Tih Kha (cheng 2000)

Best Supporting Actress : Lalthakimi - Zualteii te Unau (cheng 1500)

Best Child Artist (Male) : Jonathan Vanlalbiakhlua - Zualteii te Unau (cheng 2000)

Best Child Artist (Female) : Florence Vanlalhriatzuali - Zualteii te Unau (cheng 2000)