Chief Minister chuan ‘lehkhabu ziah hi mi taima te hna a ni a, thiam leh hriat vang ringawtin lehkhabu ziah a theih loh’, a ti. He thu hi vawiina lehkhabu pahnih ‘History and Ethnic Identity Formation in the Northeast’ tih leh ‘Problems of Peace Making in Mizoram’ tih Lalhmingthanga, MNF ‘foreign minister’ ni thin ziah, Dr.J.V.Hluna remkhawm leh edit, Baptist Church of Mizoram Savidge Hall, Khatla a tlangzarhnaa a sawi a ni.

Chief Minister chuan lehkhabu tha ngaisang mi anih thu sawiin, hetiang lehkhabu tha tak Dr,J.V.Hluna buatsaih tlangzarh thei a ni chu kan ram tana pawimawh tak leh lawmawm tak a ni, a ti a.Kan tobul hi thangthar lokal zel tur ten dik taka an hriat ngei chi a ni, a ti a. Thu dik hi a tha emaw a chhia emaw, anihna dik tak kan hriat hi a tul a ni, a ti. Mizote hi Pathianin chanchintha hril tura min duh avangin khawvela sakhaw lian ber ber pathum Hindu, Islam leh Buddhist ten min karcheh chung pawhin min rawn zawng chhuak a ni, a ti a. Chuvangin India laka zalenna kan sualnaah A duh loh zawng tharum kan hman avangin kan tlawm a phal a, tunah remna leh muanna hnuaiah khawvel ramdangte thlengin chanchintha hrilin ke kan pen chhuak thei ta a ni, a ti.

Lehkhabu tlangzarh takte hi a thlirlawkna Dr.Malsawmliana leh Dr.Lalthakima ten an nei a. Dr.J.V.Hluna remkhawm, History and Ethnic Identity Formation in the N.E. tih lehkahbu hi hlawm ruka (6) siamin articles 43 a awm a, appendix pahnih a awm bawk. A hlawm lian ber chu Mizote tobul, thlang tlak dan chungchang a ni a, a man chu Rs.1250/- a ni.Problems of Peace making in Mizoram tih lehkhabu, Dr.J.V.Hluna edit hi kum 1966 a ziah tan, March 1968 a ziah zawh hi phek 138 awmin, bung ruk a awm a, bu khat hi Rs.450/- a lei theih a ni.

Lehkahbute hi Concept Publishing Company (P) Ltd, New Delhi ina a publish a ni.