Vawiin khan Finance Minister Pu Lalsawta chuan Armed Veng South YMA Hall-ah hun hmangin khawtlang hruaitute leh tlawmngai pawl hrang hrangte nen veng hmasawnna hna thawh dan tur an rel.

Function tawite buatsaihah Pu Lalsawta chuan sawrkar hmalakna thar tur New Economic Development Policy (NEDP) chungchang sawiin kumin chhunga bul tan tur he policy kaltlanga Mizoram hmasawnna hnathawh dan tur a sawifiah a. NLUP kaltlangin mi rethei chhungkaw tam tak khaichhuah an nih tawh hnuah kum 5 chhung atan policy thar NEDP hi duan a ni, a ti. “NLUP kaltlangin mi kan tan pui a, NEDP-ah erawh chuan ‘tang’ te kan pui dawn” tiin Finance Minister chuan inkalpawhna kawng ‘link road’ te siamin loneitute mamawh intawm, mimala lei zawh si loh, hmanraw lian tham leh khawl thate lei sakin an hman tangkai theih tura chhawpchhuah an tum thu a sawi a. Mizote hi hnam thatchhia kan nilo tih hriain beiseina sang tak nen kan kal a ni, a ti. NEDP thil tum tam tak zingah thiam thil hmanga miin eizawnna an neih theihna tura kawng dap tum a nih dan leh mi hausa leh neinung, lehkhathiam te’n agriculture leh a kaihhnawih horticulture te, vety lam te luhchilh se an duh tih a sawi a. Thar chhuah chi hrang (variety) neih tama, ngah tak tak loh ai chuan luhchilh bik neih a tha zawk nia an hriat thu Finance Minister Pu Lalsawta chuan a sawi bawk.

Aizawl East-II bialtu MLA Pu Lalsawta hian Armed Veng South YMA Committee roomah pawl hrang hrang leh mimal thahnem tak kawmin an mamawh leh harsatna thlen te a ngaithla a. MLA Local Area Development Fund hmang tangkaia hmalakna tur hrang hrang chhawpchhuahte leh hmalak meknate thlirin Armed Veng South in hma a sawn zel theih nan theihtawp chhuah a nih tur thu a sawi a ni.