Vawiin khan Mizo Students Union (MSU) chuan sumdawng lianten khawtlang tana thil tha ti tura mawhphurhna an neih Corporate Social Responsibility (CSR) chungchang zirhona I&PR Conference Hall-ah an buatsaih a. Finance Minister Pu Lalsawta chu khuallian a ni.

Pu Lalsawta chuan CSR chungchang sawifiahin sumdawngten dik leh rinawm taka an hmalakna kalpuia, ram sumpai dinhmun chawi kang tura mawhphurhna an neihte, an mi chhawrte leh an chhungte khawsak mai bakah khawtlang mipui mimirte khawsak phung chawi kang tura mawhphurhna an neihte a huam vek a ni, a ti a. Ministry of Heavy Industries and Public Enterprises hnuaia Department of Public Enterprises chuan Central Public Sector Enterprise-te tan kum kaltaa chhiah an pek hnua hlawkna an hmuh belhkhawm atanga za zela 1-5  (Profit After Tax) chu CSR atan an pe ngei tur a ni tiin kaihhruaina khauh tak a siam tih tarlangin Finance Minister chuan Mizoram chhunga bank te leh Central Public Undertakings dangte chuan Mizoramah pawh he an mawhphurhna hi an hlenchhuah ngei a beisei thu a sawi a ni. NEDP chungchang bankers te zingah tarlangin he policy thar kaltlang hian hlawhtlin tum tak takte tanpui an ni dawn, a ti a. Financial Institution-te chu he policy-ah hian hmun pawimawh tak an luah dawn tiin bank hotu rual kalkhawmte thawhpuiah a sawm a ni.

MSU buatsaih Corporate Social Responsibility with Financial Institution Including Banks programme ah hian MSU President Pu R.B. Lalmalsawma chuan kalkhawmte lawmna thu a sawi a. MSU Information Secretary Pu Samuel Zoramthanpuia’n kaihhruaiin Mizoram chhunga Financial Institution leh bank aiawhte bakah Mizoram Sawrkar Finance Department Secretary Pu Lalmalsawma pawh a tel a ni. 

He sawihona programme-ah hian Mizoram chhunga bank-ten CSR an kalpui dan sawiho niin bank aiawhte hian CSR hmanga vantlang mipui tana hna an thawh tawh, thawh mek leh hmachhawp an neihte an sawi a. Mahni sumdawnna tihlar nan emaw, event sponsor-na leh a tlukpui thil dang atana CSR hman ai chuan a aia tangkai zawka hman dan kawng a awm em tih te sawiho niin sawrkar laipui Start-up India Programme thiltum entrepreneurs tharte dinchhuah theihna kawng kawhhmuh leh tanpuite, chhehvel boruak leh thil nung humhalh zawnga thawh leh ram hmasawnna tura tha an thawh theihna kawnga tha thawhte chu an tihtur zinga pawimawh tak a nih thu tarlan a ni. MSU te chuan CSR sawihonaah hian Mizoram Sawrkarin Crop Insurance Policy a buaipui mek chu peihfel thuai ni se tiin Mizorama chhunga Bank zawng zawngten 2017-2018 sawrkar kum chhung ngeia CSR pe ngei tura an beisei thu an sawi bawk.