Vawiin khan Mizoram Kailawn 2018 tlangzarhna leh Mizoram Rahbi – Micro Start Up Competition 2-na a lawmman dawngtute chawimawina Aijal Club-ah a neih a ni a. Finance Minister Pu Lalsawta chu he hunah hian khuallian niin Kailawn 2018 hi a hawng a ni.

Minister Pu Lalsawta chuan Mizoram sawrkar hnuaia ‘entrepreneurship’ tihmasawn tura hmalakna chu la reilo hle mahse thleng tui tawh viaua a hriat thu leh, kum hmasa lama Mizoram Kailawn leh Mizoram Rahbi intihsiaknaa lawmman dawngtuten hma tha taka an lakna leh hlawkna an chhar avanga lawmawm a tih thu te a sawi a. Mizoram chu “land of opportunity” a nih thu leh, chutihrual chuan thawh peihloh zawng thliar loh leh thawhrim erawh a tul thu a sawi a ni. Finance Minister chuan eizawnna kawng tha leh remchang hre mite puih chu Entrepreneurship Development Scheme (EDS) thil tum a nih angin, a hmang thiam apiangin an dinchhuahpui tur thu a sawi a. Mizoramah eizawnna ngelnghet hlawk bawk si tha tak tak vawiina kalkhawmte chuan an siam theih thu sawiin, pau khauh taka tang tlang zel turin a sawm a ni.

Pu C. Vanlalramsanga, Secretary, Planning & Programme Implementation chuan thu sawi bawkin, EDS kalpui mek hnuaia peng hrang hranga hmalakna te chu mipui lamin an bengkhawn hle a a hriat thu leh lawmawm a tih thu a sawi a. Kumin sawrkar kumtharah hian EDS atan pawisa vaibelchhia 10 dah a nih thu leh, ‘business infrastructure development scheme’ atan vaibelchhia 15 dah a nih bawk thu a tarlang a ni. IIM Calcutta Innovation park atangin an CEO Dr. Subhrangshu Sanyal chuan an institution in India state hrang hrang an lo thawhpui thin tawh atangin Mizoram chu ‘entrepreneurship development’ lamah thawhpui nuam an tih thu leh, sawrkarin tih tak meuha hma lakpui a tumna chu lawmawm a tih thu a sawi a. Nikum lama Mizoram Kailawn a tlingte training an lo neihpui atanga a hmuh danin Mizo entrepreneur thar te chu mi ti tak tak, an thil tuma chiang tak leh thahnemngai tak nia a hriat thu a sawi bawk.

Vawiin programme-ah hian Mizoram Rahbi Intihsiakna vawi 2-na a lawmman dawngtu mi 20 hnenah chawimawina hlan a ni a. Tun tum Mizoram Rahbi ah hian intihsiakna atan sector thlan bik a awm lova, application hi a vaiin 98 a lut a ni. Lawmman dawngtute chu C. Lalhriatpuia, Hillsgate News App; C. Lalrinzuali, ESDA Pickle; Carolyn Zonunmawii Chenkual, Evergreen Bakers; Dr. Vanramhlimpuii, Zonu Meat Propcessing; HV Lalzuimawia, Lalzui Research Foundation; Hriatthiampuii, Zonun Soap Station; Lalawmpuia Khiangte, Khiangte Films Videography; Lalchhandama, Zo Global Food Truck; Laldinliana, MizDen Food Delivery App; Lalhruaitluangi, Mizoram Organic Industry Pvt. Ltd.; Lalbiakzuala Ralte, P&B machinery; Lalnunsiami Pachuau, Siami Textiles and apparels; Patricia Zadeng, Kimkimi Hand Woven Textiles; R. Lalhmunmawii, Hmuni Food Processing; Rosie Lalremsiami, Bee Crafty; Vanlalpeka ralte, Vermiculture; Vanlalruati, VL Ruati Bakery; Vanlalsawma, Solid Waste to Energy; leh Vanlalramchhuangi, LT Eco Bags te an ni.

Mizoram Kailawn hi NEDP hnuaia Entrepreneurship Development Scheme (EDS) kaltlanga hmalakna kal mek a ni a, IIM Calcutta Innovation Park chu executive partner a ni a. Anni bakah hian TATA Trusts, NEDFI, Mizoram Consultancy Group, STPI, Mizoram University Incubation Centre te thawhpui an ni bawk. Mizoram Kailawn kalphung chu business plan intihsiakna neih niin, heta thlanchhuahte chu lawmman pawisafai pek annih bakah boot camp/training neihpui anni a. Chungah chuan business lama mithiam tak tak ten zirtirna pe in hmalak dan tur te an sawipui thin a ni. Kumin atan pawh hian he Kailawn Competition atan hian May ni 10 thleng dilna/application a thehluh theuh dawn a. Online in www.mizoramkailawn.org ah dilna form leh information engkim a en theih in an thehlut thei a ni. He Business Plan intihsiakna tur atan hian Form thehluh theih ni hnuhnung ber chu May ni 10, 2018 a ni a, May ni 31, 2018 ah result puan niin, Boot Camp hi June ni 12-15, 2018 chhunga neih tum a ni. Lawmman atan hian a vaia belhkhawm in cheng nuai 10 dah a ni.

Mizoram Kailawn 2018 Awareness Programme hi district tinah hman a ni dawn a, June thlaah Grand Finale leh Entrepreneurship Summit nei tura ruahman a ni.