Vawiin khan High School Science leh Mathematics zirtirtu lakthar 102 te tan SCERT Conference Hall Chaltlangah ni hnih awh tur Orientation Programme buatsaih a ni a, he hunah hian Khuallian ah School Education Minister Pu. H.Rohluna niin, Commissioner & Secretary Pi Esther Lal Ruatkimi, IRS chu Khual Zahawm a ni bawk.
School Education Minister Pu. H.Rohluna chuan thusawiin, zirlaite tan science leh mathematics pawimawhzia hria in High School Science leh Mathematics zirtirtu thar lakna tur hian School Education Department chuan nasa takin hma an lak thu a tarlanga, zirtirtu laktharte chu mi tamtak zinga a thiam bik thlan chhuah an nih avangin an hnathawhna hmun ngeiah an thiamna leh an finna te chu school naupangte tana tangkai taka chhawr theih a awm turin a chah a, aikal lak ching awmlo turin a hrilh bawk. Zirtirtute chu naupangte tan Zirtirtu nih mai bakah zirlaiten an harsatnate an thlen ngamna turin thiantha ni tel bawk turin a fuih bawk.
Khual Zahawm Pi Esther Lal Ruatkimi, IRS chuan, mizo zirlaiten ram pum huap zirna lama in elna hrang hrangah state dang zirlaite kal el phalo tan anga lang chu pawi a tih thu a sawi a, NEET exam a ti tha leh Central service inziak tling kan pun zel theihna tur chuan tuna Science leh Mathematics zirtirtute hi an pawimawh hle a ni, a ti. Pi Esther Lal Ruatkimi chuan, Zirtirtu laktharte chu Mizo hnam tan leh kan ram tan hna pawimawh tak thawktu an ni a, nakin lawka kan ram hruaitu turte chhertu an nih avangin an kovah kan hmalam hun a in nghah thui hle thu a sawi bawk.
He hunah hian Khuallian School Education Minister Pu. H.Rohluna'n "Class-X Science and Mathematics Zirna" DVD tlangzarhna hun a hmang a, he DVD ah hian Video clip 40 a awm a, Physics atangin topic 8, Chemistry atangin topic 8, Biology atangin topic 7 awmin Mathematics atangin a pawimawh zual lawrkhawm topic 17 a awm bawk a ni. Mizoram chhunga Sorkar enkawl High School zawng zawng daih tur DVD siam niin, school pakhatah Disc pathum zelin school 300 daih tura siam a ni.
Orientation programme hawnna hun hi PU. K.Lalthawmmawia, Director of School Education in a kaihruaia, Dy.SPD, RMSA Pu.C.Chawngthantluanga hnen atangin report te ngaihthlak niin Addl.Director Pu.K.Laldingliana, MCS in lawmthu sawina hun a hmang bawk.
