Vawiin chawhma khan Raj Bhavan Multipurpose Hall-ah Rajya Puraskar Award semna neih a ni. Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) Mizoram Bharat Scouts & Guides Patron ni bawk chu Khuallian niin he lawmman hi a sem a ni.

Lt. Gen. Nirbhay Sharma chuan certificate dawngtute a lawmpui thu sawiin, an beih tang tangna leh thawhrimna rah a nih thu a sawi a. Bharat Scouts & Guides Movement chu vawng nung zel turin a chah a. Mizoramah kum 3 dawn lai a awm chhunga Mizo thalaite thiam thil leh an theihna a hmuh thu sawiin, an tum ram an thlen ngei theih nan an thatlai hun uluk taka hmang turin a chah a ni. Mizoram Governor chuan Scouts & Guides naupangte chu hmalam eng takin a hmuak a ni tiin, chung hlawhtlinna hmu thei tur chuan rilru zau tak pua ram changkang zawkte tihdan an entawn hreh loh a mahni hnam tawng bakah English leh Hindi te an thiam a pawimawh thu a sawi a ni. Zuk leh hmuam bakah ruihtheih thilah inhnamhnawihlo turin a chah a. Scouts & Guides thu vawn chu an vawng a nih chuan, an zirtirtu, nu leh pa leh khawtlangin ram hruaitu atana an la ruat ngei tur thu a sawi bawk a ni. 

Sports & Youth Services Director leh Bharat Scouts & Guides State Chief Commissioner Pu Zothanmawia chuan he programme hi kaihhruaiin kum kalta chhunga an hmalaknate a tarlang a. Cubs and Bulbul 10-te Golden Arrow Award an dawng a, Scouts 5 leh Guides 22 ten Rashtrapati Award an dawng a, Scouts 74 leh Guides 102 ten Rajya Puraskar Award an dawng a ni. Scouts 232 leh Guides 294 te’n Tritiya Sopan Testing Camp an paltlang a. Scouts 3 leh Guides 1 te’n Himalayan Wood Badge Training Nagaland ah an nei a ni. Swachh Bharat Abhiyan hnuaiah Unit 85-te’n faina hnatlang leh thing phunna an nei a ni. Tun dinhmunah Mizoram Bahrat Scouts 600 leh Guides 922 ten Rajya Puraskar Award an dawng tawh a, member 4424 an nei mek a ni.

He hunah hian Scouts 52 leh Guides 58 te hnenah Rajya Puraskar Certificate hlan a ni a. Pi Boihchhingpuii, Mizoram Bharat Scouts & Guides Vice President-in lawmthu sawiin a khar a ni.