Vawiin khan Mizoram Youth Commission (MYC) buatsaih ‘Army Coaching’ chu Finance Minister Pu Lalsawta’n MYC office hall-ah a hawng a.

Khuallian, Finance Minister Pu Lalsawta chuan ‘Army Coaching’ hawnna paha thu sawiin coaching kal tura in ziaklut, thalaite chu tlawmna nun nei tur leh zirtirtute thu awih chunga thahnem ngai taka zir tura a fuihin “Kar hnih in thawhrimna hian in kum khaw nawmna a hril dawn a ni,” a ti a. Indopui 1-na leh Indopui 2-na laia Mizo sipaite chu an hotute duhsak leh rin ber ber an ni tih sawiin Minister chuan Mizo nun mawi vawng nung zel turin coaching kal tura inziaklutte chu chahin hlawhtling ngei turin duhsakna a hlan bawk. Mizo thalaite hian hmabak eng tak an nei tih sawiin Finance Minister chuan, “MYC hmalakna hrang hrangte pawh sawrkarin a ngai pawimawh hle a ni,” a ti bawk.

Army Coaching hawnna inkhawmah hian MYC Chairman Pu T. Sangkunga, MLA pawhin MYC hmalakna kal mek leh hmachhawpte a tarlangin, “Mizoram sawrkarin thalaite hmakhua ngaih em avangin MYC hmalakna apiang chu sum harsatna karah pawh a pui zel thin a ni,” a ti a. Kum dangah pawh sipai lak hi vawi tam tak neih a ni tawh a; mahse puanzarna lam a chak tawk loh thin avangin Mizo thalai tam takin an hun tha an bawhpelh tawh tih sawiin, “MYC chuan thawktu indaihlo tak chung pawhin thawktu lak belh ai chuan Mizo thalaite tan coaching leh training hrang hrang buatsaih nan leh hna ruak puanzar nan a sum neih ang chu a hmang zawk thin a ni,” a ti bawk. Mizorama NGO hrang hrangte leh zirlai pawlte pawhin MYC hmalakna an phurpui thin chu lawmawm a tih thu sawiin Pu T. Sangkunga chuan February ni 20 leh ni 23-a Aizawl leh Lungleia Indian Air Force lakna lo awm turah pawh Mizo thalai, Class 12 (Science) passed chin, a tam thei ang ber tel turin a sawm bawk.

Army Coaching hawnna inkhawm hi MYC Member Pu Nghaklianmawia’n a kaihruaia. Sainik Welfare Board Director, Surg. Lt. Commander (Rtd) Lalnuntluanga chuan Coaching pek dan tur hrilhhriatna hun a hmang a. Tun tum sipai laknaah hian mi 550 velin physical leh medical test paltlangin written test an hmachhawn dawn a. Written test hmachhawn turte tan Coaching hi a thlawn a kal theih tura buatsaih niin Eastern Military Coaching Academy leh Youth Vikas Society-ten zirtirna an pe thin dawn a ni. Coaching Class hi Secretariat Complex-a MYC Office building chhawng hnuai berah neih a ni ang a, zinglam class chu General Duty tan buatsaih niin, tlailam erawhchu technical tan bik a ruahman a ni. Coaching hi kar hnih chhung kalpui tur a ni a, zirlaite tan pawh an school timing tibuailo thei ang bera kalpui tum a ni.

He inkhawm hi Labour & Employment Department Director Pu Lalhmachhuana, MCS leh Youth Vikas Society member engemawzatin an hmanpui bawk.