Vawiin World Mental Health Day puala VOLCOHM in Millenium Centre Atrium-a hun a buatsaihah Finance Minister Pu Lalsawta chu Special Guest a ni a, Volunteers for Community Mental Health (VOLCOMH) Patron Pu Lal Thanzara, Health & Family Welfare Minister chuan hun a hmanpui bawk.

Minister Pu Lalsawta chuan khawvelin hma a sawn chhoh zel rual hian mihring nitin nun leh hun hman dang a danglam in a buai chho zela, harsatna pawh a tam phah in, rilru hrisel pawimawhna a lang chho telh telh a ni, a ti a. Khawvel a mi hlauhawm ber te chu mi beidawng, mahni nunna pawh lak hrehlo te an nih thu tarlangin, rilru hrisel pu mite thung chu eng anga harsatna nasa in tlakbuak mahse an beidawng ngailo a ni, a ti a. Minister Pu Lalsawta chuan khawvela kan nun hi tawp hun a nei anih avangin kan la awm lai hian midang tan enge kan tih ve theih ang tih ngaihtuah chungin, vawiina kalkhawmte hian midang rilru hah pakhat tal chhawk dam tuma rilru siam kan tum tur ani, a ti.

Minister Pu Lal Thanzara pawhin thu sawiin, mihringte chu harsatna tawkin rilru tihahtu hrang hrang kan tawk thin a. Amaherawhchu heng harsatnate hi inhneh tir lova, a eng zawnga thil thlir thiam zir zel chungin leh, kan bulhnai ami kan chhungte leh thian tha te nena inpawh taka nun te kan thlang zawkl hian nasa takin harsatna te kan sual hneh thei dawn a ni, tiin kalkhawmte chu rilru hrisel tak put tum tlat turin a sawm bawk.

Vawiin hunah hian VOLCOMH President Dr. Zoengpari leh Secretary Pu Ngurthansanga ten thu sawi telin, VOLCOMH thawhpui NGO hrang hrang te leh School panga atangin zirlaite an tel a ni. Volunteers for Community Mental Health (VOLCOMH) hi kum 1992 khan din niin, khawtlang mipuite rilru hrisel an put theihnana hmalak leh, rilru lama harsatna tawkten nun nuam leh hlim tak an neih theih nana hnathawk tura din a ni.