Vawiin khan Pu T. Sangkunga, MLA, Chairman, Mizoram Youth Commission chuan sipaia tan tumte tana inkaihhruaina tur lehkhabu, ‘Army Recruitment Guide’, Pu J Lalhmangaihsanga ziak chu Aizawl Press Club-ah a mamawh apiangte chhiar turin a tlangzarh.

Pu T. Sangkunga chuan Army Recruitment Guide chu sipaia tan tumte tana inbuatsaihna tha tak, November ni 2 atanga ni 6 Army Recruitment Rally-a tel turte tan phei chuan lehkhabu tangkai leh rawn tlak tak a ni dawn, a ti a. Mizoram Youth Commission hian nikum lama an tih tawh ang bawkin November thlaa recruitment rally neih turah Physical leh Medical-a tlingte chu Written Test neih tur atan Coaching pek leh an tum thu a sawi bawk. MYC Chairman chuan MYC hnuaia Skill Training Programme kalpui mek chungchang sawi langin Mizo thalai 72 ten Deltin Royal & Casino, Goa hmun ah hna an thawk tawh a, a dang 31 te hian 1.11.2016-ah an zawm leh ang tih sawiin, 48 thlan sa ten Offer of Appointment an nghak mek a ni, a ti.

He lehkhabu ziaktu Pu Lalhmangaihsanga chuan he lehkhabu siam tura document pawimawh hmun hrang hrang atanga a lakkhawm dan a sawi a. Surg.Lt.Cdr. (Rtd.) Lalnuntluanga, MYC member ni bawk chuan lehkhabu chhung thu tlangpui tarlangin Army Recruitment Guide lehkhabu-ah hian Soldier GD/Clerk/Technical, Military Nursing Assistant/Service, Officers Cadre-a luh tumte tana thil tangkai tam tak bakah zawhna hlui engemawzat dah a ni, a ti.

Lehkhabu tlangzarh inkhawm, MYC Member Pu Nghaklianmawia kaihhruaiah hian Col. Manish Natu, Director, Army Recruiting Office pawhin sipai tang duhte tana thil pawimawh a sawi a. Kum danga 4000 aia tam in an dil thin laiin tun dinhmunah mi 1300 chauhin an la dil tiin thlalai tam zawkin dil se a tih thu a sawi bawk.