Vawiin chawhma dar 11.00 khan Economics & Statistics Department buatsaihin Aijal Club-ah Statistics Day vawi 6-na urhsun taka hman a ni a; he ni puala inkhawmah hian Finance Minister Pu H. Liansailova chu khuallian a ni.

Finance Minister chuan chipchiar taka thil chhinchhiahna leh zirchianna (statistics) chu ram hmasawnna tura ruahmanna siam dawn reng rengin a bul-thut a ni tih sawiin, “Economics & Statistics hnuaia thawktuten fir taka kan ram dinhmun an zirchianna leh chhinchhiahna tel lo chuan eng ruahmanna tha mah a siamchhuah theih loh a; chuvang chuan kan statistics khawnkhawm hi a rintlak tur a ni” a ti a. Mi thenkhatten statistics behchhan bulfuk nei hauh lova huaisen tak taka thu leh hla an neih thin avanga inhnialna awm thin chu pawi a tih thu sawiin, “Kan rama buh leh bal tharchhuah zat chungchangah te, industry lama kan hnufumna leh kan mu-tan te, ke kan pen lehzel dan tur chungchangah te kan ngaihdan leh kan rawtnate chu statistics behchhan a nih a pawimawh a; rinthu kan sawi hian inhnialna a chhuak thin a ni” Pu H. Liansailova chuan a ti. Mizoram tana project chi hrang hrang siamtuten statistics tha an behhchan loh fo avangin hmasawnnain a hnufum phah thu Finance Minister chuan sawiin, “Project tam takte hi a taka kutthlak a nih dawnin kan sum hmuh leh a senso tur a inmil lo fo a; hei vang hian ram tana thil tha tak ni tura bul tan tawh tam tak chu peih mai theih a ni thin lo a; hei hian statistics rintlak kan behchhan a tulzia a tilang a ni” a ti.

Statistics Day hi India ramin Father of Modern Statistics ti-a a vuah Prof. Prasanta Chandra Mahalanobis pian champha phak hriatrengna atan kum 2007 atang khan hman tan a ni a. Kum tin he ni pual hian thupui thlan a ni thin a; kuminah hian Industrial Statistics tih chu thupui atana thlan a ni a. Mizoram-ah ‘The Micro, Small and Medium Enterprises Development Act, 2006’ hnuaia industry inziaklut hi a zavaiin 1555 a ni a; heng industry-te hian mi 12683 tan eizawnna a siamsak mek a ni.

Vawiina Statistics Day puala inkhawm hi Pu Saihlira, Director, Economics & Statistics chuan a kaihruai a; Finance Minister hian he Department thil chhinchhiahna lehkhabu pali : kum khat dana chhuak - Statistical Abstract 2011 te; Hospital Statistics 2011 te bakah kum tina tihchhuah thin Meterologival data of Mizoram, 2011 leh Annual Report of Birth & death, 2010 te chu a tlangzarh a ni. He inkhawmah hian Mizoram-a Economics & Statistics hotu hmasate an telkim hle a; chawhnu lamah inkhawm palaiten Pu C. Liantluanga, Research Officer buatsaih – Industrial Statistics tih leh Dr. Lalrinchhana, Sr. Research Officer buatsaih Plan Formulation tihte chu an zirho a ni.