Vawiin chawhma khan Mizoram University Auditorium ah UGC-Women's Studies Centre, Mizoram University leh Mizoram State Entrepreneurship Development Monitoring Commitee (MEDMOC) buatsaihin Ni Hnih awh tur Handloom, Food and Flower Show hawnna hun hman a ni a, Finance Minister Pu Lalsawta chu Khuallian niin Dr C.Vanlalramsanga Secretary Planning, UD&PA chu Khual Zahawm a ni a, Mizoram Florist Association President Pi Lalropari, MHIP general Head quarter aiawhte leh, MZU department hrang hranga hotu leh zirlaite bakah Veng engemawzat atangin pangpar, eitur leh handloom siam chhuah chhawpchhuak tura lo kalten he hun hi an telpui a ni.
Handloom, Food and Flower Show hawnna ah hian Finance Minister Pu Lalsawta chuan Mizoram University hi Zirna lama hma hruaitu mai ni tawh lovin Mizoram tana hmasawnna lama min kaihruaitu a ni chho zel hi MZU hotute leh thawktute an fakawm takzet a ni, a ti a, he Show buatsaihtu UGC-Women's Studies Centre, MZU leh MEDMOC ten Pangpar khawi, Eitur chi hrang hrang siam leh Handloom lama eizawngte phochhuah leh chawikanna kawnga hma an la hi a lawmawm hle a ni, a ti. Pu Lalsawta chuan Mizoram chu khawvel ram hrang hrangte nena khaikhin chuan hmasawnna hi kan hmu tlai hle a, amaherawhchu tunah chuan khawvel hmun danga hmasawnna kan hmuh ang hi Mizoram ngeiah pawh a awm ve ta zel hi a lawmawm hle a ni, a ti a, Entrepreneur ten an thiam thil leh theih thil hmanga mipuite mamawh an siamchhuaha kan ramchhung ngeia insumdawntawnna alo awma kan mamawh zualpui kan intodelhna hi hmasawnna diktak chu a ni, a ti a, Entrepreneurship lamah thangtharte tan laa uar deuh deuh turin a chah bawk.
Dr Vanlalramsanga chuan Mizorama Entrepreneurship Development Scheme hun reilote kan kalpui chhung hian hmasawnna tamtak a awm niin a lang, a ti a, Mizoram entrepreneur bikah hian kan hmeichhiahte hian an thawh hlawk hle a ni, a ti. Dr Vanlalramsanga chuan Mizo entrepreneur te chu Mizoram tana hmasawnna leh thangtharte tana eizawnna ngialnget kawhhmuh tu ni thei tur khawpin tihtakzeta thawk turin a fuih bawk.
He show Ni Hnih awh turah hian Flower show, Handloom show, Food Show bakah Gender Sensitization programme a awm a, Entrepreneur ti thate tan lawmmante siam niin Flower Arrangement ah Training a duh te hnenah pek an ni bawk ang. He hunah hian Prof. Lalneihzovi buatsaih "Gender Equality and Sustainable Development with Special Reference to NEI" leh "Recipes" tih lekhabu tlangzarhna hun hman a ni bawk.
