World Health Organisation (WHO) leh hriselna lam kaihhnawih pawl hrang hrangte tangkawpin May ni 31 hi ‘World No Tobacco Day’ah an puan angin khawvel hmun dangte rualin vawiin khan Mizoram-ah pawh he Ni puala inkhawm pui ber chu Hawla Auditorium, Aizawl-ah School Education Minister Pu H.Rohluna hovin hman a ni. World No Tobacco Day puala inkhawm hi National Service Scheme (NSS), Indian Society on Tobacco & Health (Mizoram) leh National Tobacco Control Programme (NTCP) tawngkawpa huaihawt niin he hunah hian ISTH Mizoram President Pi Lal Riliani, NTCP Mizoram-a State Nodal Officer Dr.Jane R.Ralte leh State NSS Officer Dr.Zirlianngura te, Campaign for Tobacco Free Mizoram Ambasaador te, Mizorama zuk leh hmuam titlem tura thahnemngai taka thawk thin leh thawk mek te leh sikul zirai engemawzat an tel.
World No Tobacco Day puala inkhawm Mizoram State Sports Council Secretary Pu C.Laltlanthanga kaihhruaiah Khuallian Pu H.Rohluna chuan miten an nuihzat karah pawh beidawng duh lova zuk leh hmuam titlem tura thawk ngat ngat Indian Society on Tobacco & Health Mizoram te hnathawh a fak a, a bik takin ISTH Mizoram President Pi Lal Riliani thahnemngaihna leh kum 30 chhunga a hmalakna rah duhawm tak hmuh chho tur a awm mek hi a lawmawm takzet a ni, a ti. ISTH Mizoram leh an thawhpuite hmalakna avangin vawiinah chuan Mizoramah pawh mipui puipunna leh vantlang inkhawmna hmunah te zuk leh hmuam ti lai hmuh tur an tlem sawt tawh hle a ni, a ti bawk. NSS zirlai naupang kalkhawmte fuihin School Education Minister chuan zuk leh hmuam chuan an nih tur ang a nih loh tir thei a ni ti hria a, a la ti lote chuan ti lo hlen tura a duh thu a sawi. Sorkar pawhin zuk leh hmuam do kawngah hma a la mek zel a, Bazarpui New Market Area-a vaihlo leh a kaihhnawih zuarte pawh an thutna lai a ulau em avangin hmun biru zawkah insawn tura ngenna lehkha pek an nih thu leh thu awih taka an insawn thuai a beisei thu Minister chuan a sawi. Mihring tana hnawksak leh mihring hmel titawptu thil reng reng kalsan vek turin World No Tobacco Day-a kalkhawmte leh Mizoram mipuite a chah a ni.
Indian Society on Tobacco & Health, Mizoram President Pi Lal Riliani pawhin thu sawiin 11th May, 1989 atang khan zuk leh hmuam titlem tura chawl lo leh beidawng lova an hmalakna chuan vawiinah rah duhawm tak tak a nei zel a ni, a ti a. Mizote chu Kristian kan nih angin kan thlarau nun nen pawhin kan taksa leh landan kan tihthianghlim hi a inmil tlat a ni, a ti bawk. Zu leh ruihlo dangte duh loh vangin kawngzawh an awm thin a, zuk leh hmuam do chuan sawisel leh nuihzat hlawh a awl hle tih sawiin Pi Lal Riliani chuan ISTH hruiatu chu Pathian a nih tlat avangin hmasawnna hmuh tur a awm zel a, sorkar pawhin an hmalaknate thlawpin sorkar pisa leh sorkar thiltihnaahte zuk leh hmuam an khap ta zel hi a lawmawm takzet a ni, a ti.
Hnamdangin an neih ve loh, Mizoten kan chin tha lo tak chu tuibur a ni tih sawiin ISTH President chuan tuibur siamte pawh midang tana tur siamchhuak an nih thu leh an siamna hmun bul vela awmte tan an hnawksakzia an hrilh hnu pawhin sim duh an awm mang lo chu a vanduaithlak hle thung a; NLUP hnuaiah eizawnna dang ngaihtuah saka thlem pawhin tuibur siam an zawngchhang tlat hi a pawi takzet a ni, a ti bawk. Tunlai thangthar zingah vaihlo hmanga siam tho ‘gutka’ leh ‘tiranga’ avanga hriselna lama harsatna tawk namen lo naupang leh thalai, zirlai zingah pawh an tam hle a, sorkar pawhin heng langsar lo zawk vaihlo atanga siam thilte pawh khauh leh zuala khap a ni mek a ni, a ti. ISTH, Mizoram President Pi Lal Riliani chuan zuk leh hmuam tel lo Zoram Khawvel siam turin mi zawng zawng a sawm nghe nghe a ni.
State Nodal Officer, National Tobacco Control Programme Dr.Jane R.Ralte chuan vaihlo leh a kaihhnawih, zuk leh hmuam chungchanga tuna Mizoram dinhmun a sawi a. Global Adult Tobacco Survey (GATS)-in zirchianna a neihah kum 2009-2010 khan zuk leh hmuam-ah Mizoram chu a sang ber (67%) a, chumi atanga kum 20 chhung an hmalakna avangin tun kum 20016-2017-ah chuan GAT Survey-ah Tripura a sang ber a, Mizoram chu tla hniam hretin pahnihna (59%) a ni tih a tarlang. Kum tin khawvel pumah vaihlo leh kaihhnawih avangin mi maktaduai 1 an thi ziah tiin mithiamte chuan an chhut a, zuk leh hmuam tihtlem loh chuan kum tin mi tlunglehdingawn 1 an thi zel thei dinhmunah kan ding mek a ni tih a sawi bawk. Mithiamte chuan vaihlo chu ‘gateway drug’ (drug kailawn) a ni a, vaihlo addict tawhte chuan zu, ganja, heroin leh inchiu chi drugs pawh an tikai vat thei a ni tiin a hlauhawmzia kan hriat a ngai a, thailai zuk leh hmuam tiah phei chuan Northeast-ah Mizoram kan sang filar lak a ni tih Dr.Jane R.Ralte chuan a sawi a. Kum 2016-2018 chhung khan vaihlo leh kaihhnawih thil an man leh tihral tak zat chu Rs.50,28,790/- man hu vel a ni tih a tarlang a ni.
Kumin ‘World No Tobacco Day’ thupui atana an thlan ‘Tobacco and Heart Disease’ (Vaihlo leh Lung Natna) chungchangah kalkhawmte hriat tur thil pawimawh tak tak Dr.Mary C.Lalnuntluangi, Clinical Cardiologist chuan a lem nen a sawifiah a. Campaign for Tobacco Free Mizoram Ambassador Tv.Vanlalsailova leh Tv.TBC Zaithanpui ten thu leh hlain mipui zawng zawngte zuk leh hmuam sim turin an sawm bawk a ni.
Tobacco Control lama thawktha mi 4 hnenah Khuallian Minister Pu H.Rohluna chuan chawimawina a hlan nghal a, chungte chu :
1. Dr. Jeremy L.Pautu, HoD, Dept of Oncology, MSCI
2. Vanlalsailova, Ambassador, Campaign for Tobacco Free Mizoram
3. TBC Zaithanpuia, Ambassador, Campaign for Tobacco Free Mizoram
4. Anti-Tobacco Committee, Thingsulthliah Tlangnuam (Tobacco Free Village) an ni.
