Vawiin khan National Academy of RUDSETI, Bengaluru leh Mizoram State Rural Livelihood Mission (MzSRLM) tangkawp buatsaihin State Institute of Rural Development and Panchayati Raj (SIRD&PR) Conference Hall, Durtlang Leitanah ni nga chhung awh tur training of Master Trainers on Financial Literacy neih tan a ni a. SIRD &PR Director Pi Maria CT Zuali chuan he training hi a hawng.

Training hawnna inkhawm, training Coordinator Pu NR Srinivasa Murthy kaihhruaiah hian Pi Maria CT Zuali chuan hetiang ang training pawimawh Mizoramah SIRD&PR hmunah neih a nih chu lawmawm a ti a. Sum enkawl leh peipun lamah hmasawnna tur kan la ngah hle a, bank-te pawhin tih tur pawimawh leh mawhphurhna sang tak an nei a, an inhawn a ngai hle niin a sawi. Thingtlang khuaa Self-Help Group-ten sum leh pai peipunna kawngah hma an sawn ngei theih nan vawiina training nei tura kalkhawmte chu an pawimawh a, United Nations hmalakna sustainable development goals tihhlawhtlinna tur pawimawh tak a nih tur thu a sawi bawk. SIRD &PR Director chuan thingtlang khuaa mi harsa leh rethei zawk ten an chhawr tangkaia, an thawhchhuah a lo pun theih nana zirtirtu tur an nih avangin taima tak leh thahnemngai taka training nei turin a chah a ni.

He training-ah hian District hrang hranga MzSRLM hnuaia thawkte, State Bank of India leh Mizoram Apex Bank atangin an vaiin mi 30 an tel a ni.