Vawiin chawhma dar 10:00 khan Project Pushpak Golden Jubilee pualin Government  Middle School Hnahthial-ah Free Medical & Blood Donation Camp buatsaih a ni a, he hun hi Brigadier Virender Singh, Chief Engineer, Project Pushpak chuan khuallian niin a hawng a, Chief Engineer hi a nupui Mrs. Sarika Jamwal, Zonal Chairperson BROWWA in a tawiawm a ni. Hnahthial leh a chhehvel mipui inentir an thahnem hle.

Khuallian Chief Engineer, Brig. Virender Singh chuan Project Pushpak Golden Jubilee puala Free Medical & Boold Donation Camp buatsaih tura an inpuahchahna kawngah Civil Administration leh YMA ten an hun leh tha senga an tawiawm avangin an chungah lawmthu a sawi a.  Project Pushpak chuan kum 50 chuang Mizoram-ah hna thawk tawhin kawng kilometer 3600 a thui leh meter 2200 a sei lei a dawh tawh thu a tarlang a.  Inentir tura kalkhawm zawng zawng leh Doctor-te hnenah lawmthu sawiin Brig. Virender Singh chuan Free Medical & Boold Donation Camp chu an hlawkpui theuh theih nan duhsakna a hlan nghal bawk.

Kalkhawmte lawmna thu sawitu Shri. SK. Chaubey, Commander chuan Chief Engineer leh a nupui Zonal Chairperson BROWWA ten an hun hlu taka senga an tel theih avang te, Group YMA hruaitute, SDPO ten leh mipui he hun hmang tura kal zawng zawngte chungah lawmthu a sawi a. Mizorama kum 50 chuang an awm chhunga an hmalakna hrang hrang te a tarlang a. Tuipui-ah marboart service tir mek a nih thu sawiin hei hi Saiha District te nen kan inkalpawhna kawng pawimawh tak a nih avangin marboat service mai duh tawk lovin Tuipui-ah hian lei lian kan dawh dawn a, hei hi kum 2/3 a kal leh chuan zawh theih a ni dawn a, he lei dawh tur hi meter 340 laia thui a ni dawn a, he lei dawh hna hi financial year tharah chuan kan tan thei dawn a ni, a ti a. Chak taka hmalakna kan neih theihna chhan chu Mizo mipuite tawiawmna vang a ni a, thawhhona tha neih chhunzawm zel theih nan tuna Free Medical Camp leh Blood Donation camp te hi buatsaih kan ni a, a thlawnin damdawi pawh kan sem chhuak dawn a ni a ti bawk.

Doctor specialist chi hrang hrang Medicine, Surgical, Gynaecologist, Pediatrician, Eye, ENT, Dental an thu a, Urine, Blood Biochemical, ECG leh HIV Screening a thlawnin an tih nghal bakah Civil Hospital Lunglei nen tangkawpin Blood Donation camp an buatsaih nghal bawk a ni. Vawiin khan inentir tura hming ziak lut 1500 chuang an awm tawh a ni. Free Medical Camp hi naktuk lamah pawh chhunzawm leh a ni ang.