Khawvel pumpuia November ni 13-19 chhunga hman tur "World Antibiotics Awareness Week" chu vawiin khan Aizawl-ah pawh Civil Hospital Conference Hall-ah a hawnna neih a ni. He antibiotics chungchanga inhrilhhriatna hapta hawnna inkhawm hi Health Minister Pu Lal Thanzara chuan hmanpuiin, kumin atan thupui thlan chu "Antibiotics i hman hma in mithiam te rawn rawh" tih a ni.

Health Minister chuan antibiotics hman uar leh lutuk avangin natna do kawngah tangkaina aiin harsatna a thlen phah zawk thei tih hi zau zawka mipuiin kan hriat a tul a ni, tiin Antibiotic Awareness Week hman a ni chu lawmawm a tih thu a sawi a. Antibiotics chu natna chi hrang hrang thlentu zinga natna chi khat ‘bacteria’ dotu, damdawi hlu leh tangkai tak ni mahse heng bacteria-te hi an dam khawchhuahna tur atan anmahni dotu te beilet ve reng thin, antibiotics lakah pawh an dam khawchhuah theih nan insiamdanglamna tur dap reng an nih thu te leh, hei avang hian damdawi in awmzia a neih theihloh nan an insiamdanglam (resistant) fo thin thu Minister hian a sawi a. A tul lo leh doctor chawh nilova antibiotics hman chuan bacteria te damdawi laka resistant tura insiamtheihna awlsam a nih bakah natna zawng zawng hi bacteria thlen a nihloh avangin bacteria natna thlen nilo puia antibiotic a enkawl emaw, antibiotic diklo hman emaw, a dose diklo inchawh avang te in natna hrik bacteria chu chhawih kawlh lek theih a nih theih thu Minister Pu Lal Thanzara chuan a sawi a. Damdawi laka heng natna hrik te hi an resistant tlat tawh chuan a bak chawh leh tur a vang dawn hle a ni tiin, heng zawng zawngah hian mawhphurtu chu doctor leh pharmacist-te bakah mipuite pawh kan ni tlang vek a, fimkhur nachang hria a inhrilhhriatna uar turin leh mithiamte thuawih nachang hriat pawimawh thu Pu Lal Thanzara chuan a sawi a ni.

Health Minister hian NEDP kaltlanga Civil Hospital atan inenkawlna hmanrua chi hrang hrang, a vaiin Rs. 1,95,26,367 man lei a nih tawh thu sawi tel bawkin, chung zingah chuan Colposcope Machine (1), Oxygen Cylinder B type (100), Oxygen regulator (65), Silent Generator (2), Hydraulic Operation Table (1), ICU Ventilator (2), Bronchoscope flexible (1) leh Orthopaedic OT Table (1) a tel a ni. Rogi Kalyan Samiti (RKS) hnuaia Hepatitis C enkawlna, ni 27.2.2017 atanga tan tawh chu vawiin thlengin he scheme hnuaiah hian mi 563 hnenah a thlawnin enkawlna pek a nih tawh thu leh, senso zat chu Rs. 1,10,72,090 a nih thu a sawi bawk a. Hemi bakah hian Dr. Ambedkar Medical Aid Scheme hnuaia Aizawl Civil Hospital kaltlanga tanpuina dil zat chu mi 68 tling tawhin, heng zingah hian mi 39 in tanpuina hi hmu in, Rs. 74,13,856 pekchhuah a nih thu a sawi bawk. Dr. Ambedkar Medical Aid Scheme hi Sorkar laipuia Ministry of Social Justice & Empowerment hnuaia SC/ST kum khata chhungkaw sum lakluh Rs.2,50,000 aia sanglo, sorkar hnathawk awmlohna ah natna khirh tak tak (heart surgery, kidney surgey/dialysis. cancer surgery/ chemotherapy/ radiotherapy, brain surgery, kidney/ organ transplant, spinal surgery, etc) vei te enkawl nan dil theih a ni.

World Antibiotics Week 2017 hawnna inkhawm hi Dr. F. Lallianhlira, Principal Director, H&FW Department chuan kaihhruaiin, Dr. Lalsawma, Jt. Director (F&D), Health Services hnen atangin sawi hawnna ngaihthlak a ni a. Dr. C. Zothanmawia, RIPANS leh Pi C. Malsawmtluangi, Assistant Professor, RIPANS te atangin antibiotics hman dan chungchanga hriattur pawimawh leh fimkhur a tulna te presentation ngaihthlak a nih bakah kalkhawmten antibiotics chungchang sawihona an nei bawk. Hun hi Dr. H. Lalchungnunga, Director, Health Services chuan lawmthu sawiin a khar a ni. Vawiin programme-ah hian Health & Family Welfare Department a hotu leh thawktute leh hospital dang leh RIPANS, College of Veterinary Sciences & Animal Husbandry leh institution dang atanga mi sawm te an tel a ni.