Tukin zing dar 7:00 khan Lunglei DFO Pu Kawlhnuna Kaihhruaiin Fire Prevention Week chu Lunglei DC Pu V. Sapchhunga\'n Art & Culture Auditorium a inkhawm buatsaihah a hawng.

Hawnna thusawiin DC chuan mei hi hmanraw tangkai leh tha tak, khuahkhirh loh chuan chhiatna thlentu a ni a, kan khawtlanga a pawi khawhna thlentu hi kan fimkhur tawkloh vang a ni a ti. Kan fimkhur loh avangin midang tam takin an tuar thin a, midang te tana tuarna thlentu nih loh hi kan hlawhtlinna a ni. Lo nei mi kan ni a, mei kawng sial kawng ah fimkhur tak leh uluk tak a sial a pawimawh in sawrkar thu kan zawm phawt chuan kan ram hian hma a sawn ngei ang a ti. Kangmei lak a inven hi midang kutah dah lovin keimahni theuh hi a vengtu tur kan ni a ti bawk.

He kangmei ven hapta hawnna ah hian Pu P.Lalhmangaihzuala, President, Sub-Hqrs. YMA Lunglei leh Pu C.Zairemthanga, Chairman Honorary Wildlife Worden Lunglei District te chuan thuchah tha tak an sawi bawk.Pastor H.Lalmuanchhana Venglai Pastor bial Presbyterian chuan hunserh a hmang bawk.

Kangmei venna lam a thuziak tha Chanchinbu mi lawmman dawngtu te chu: 1) Editor, Vulmawi Rs.3,000/- leh Certificate ; 2) Editor, Zochhiar Rs.2,000/- leh Certificate ;3) Editor, Zunzam Rs.1,000/- leh Certificate