Vawiin khan ni hnih awh tur District Level Training of Trainers (ToT) on Anti-Human Trafficking chu I&PR Conference Hall, Serchhip-ah tan a ni a, Pu T. Lalhmachhuana, Civil Judge-cum-Judicial Magistrate 1st Class chuan khuallian niin a hmanpui a, Pu Joseph Lalchhuana, MPS SP (CID Crime) leh a hoten, NGO hruaitute leh heti lampang buaipuitu Police te hnenah zirtirna an pe dawn a ni.

Pu Lalrinawma Addl SP kaihhruai training hawnna inkhawmah hian Chief Guest Pu Lalhmachhuana chuan thusawiin mihring inhralh leh mihringa sumdawnna lakah mitin fimkhur a tul tawh thu sawiin, chanchinbu lama hna zawrhna hrang hrang te pawh kan zir chian a hun tawh thu a sawi a. Hlawh leh thiamna inphu lo lutuka inzawrhna ang chite hi kan hnawl ngam a hun tawh a ni a ti.

Khuallian chuan mihringa sumdawnna lamah chuan mipat hmeichhiatna lam hawi hi za-a 60 lai a nih thu leh a dang za-a 30 chu tihluihnaa inchhawr te leh taksa peng inhralh leh lei luihsak te an ni tlangpui tih sawiin, heng thil tuartu tam ber te chu mi harsa leh chhumchhia te an ni fo thin a ni a ti bawk.

Pu T. Lalhmachhuana chuan pawl zahawm taka hruaitu rualte hnena hetiang zirtirna hun buatsaih a ni chu lawmawm a tih thu sawiin humhim ngaite hum a, ven ngaite veng tur leh dan bawhchhetu ten rorelna dik an hmachhawn theihna tur atan vawiina hetiang zirtu te zawng zawng leh sawrkar hi kan tanrual tlat chuan thil tam tak kan ti thei ang tih ka ring tlat a ni a ti bawk.

Pu Joseph Lalchhuana pawhin key-note address pein mihring hmanga sumdawnna hi hmasawnna ni si lo, hmasawnna in a ken tel ve tlat a nih si avangin fimkhur nachang hriata inven reng hi a tul tawh a ni a ti a. A tlangpui thuin hetiang tuartute hian khawtlangah thinhrik an la hlawh lo thei lova, zahawmna a tihniama mahni pawh an inngai hniam fo thin a, chuvangin nunkawng a tichhe nasa bik em em a, nasa taka do a ngai a ni a ti.

Pu Joseph-a chuan mihringa sumdawnna hi dan bawhchhiatna lian ber pahnihna a ni a, sumdawnna lamah pawh ruihhlo leh ralthuama sumdawnna dawttu niin khawvela sumdawnna lian ber pathumna a ni tih sawiin tuna khawtlang leh pawl zahawm tak taka hruaitute hian midangte hnena zirtirna pechhawng leh thei tur khawpin zir ila kan hnam hi a theih chin chinah venhim a, humhin i tum ang u tiin kalkhawmte a sawm bawk a ni.