Vawiin chawhnu hian HD Rosanga Multipurpose Hall, Govt. Serchhip College ah Serchhip District Fire Prevention Week, 2019 hawnna inkhawm buatsaih a ni a, Pi Sangchhin Chinzah, Bawrhsap leh District Fire Prevention Committee Chairman ni bawk chu khuallian a ni.

Pi Sangchhin Chinzah chuan, Mizoram chu India rama ram tikang nasa ber te zinga mi kan ni a,  2004-2007 inkar leh 2009-2010 chhung khan Satelite hmanga endiknaah ram tikang nasa ber kan ni a, 2007-08 leh 2010-11 ah pahnihna kan ni bawk. Ram kang tihlana Map-ah phei chuan kan ram pum hi kan tikang ta emaw tih mai turin a awm a ni, a ti a.  Mipuiten kan ram hi kang laka kan chhanhim loh chuan a chhunga cheng keini pawh hi kan him bik dawn chuang lova ni, a ti. Ram kang vanga mihringin a hloh nasat dan te tarlangin a veng turin mitinin mawh kan phur theuh va, kang laka venhim dan hmasa ber leh awlsam ber chu “tihkan loh” a ni, a ti a ni.

Pu Lalduhthlana, DFO Thenzawl leh Member Secretary District Fire Prevention Committee chuan Report pe in Mizoram dinhmun tlangpuite, Serchhip District dinhmun leh hmalak tawh dan te, kumin Fire Prevention Week a hmalak dan tur Committee in a ruahman te sawifiahna a nei a. Pu. Ramengmawia, President MJA, Serchhip District kaihhruainain kalkhawm mipuiten Fire Prevention Week thutiam an sawi rual bakah Pu R. Sanghmingthanga, President, Sub- Headquarters YMA hnen atangin thusawi ngaihthlak a ni bawk.

Vawiina Fire Prevention Week, 2019 hawnna inkhawm hi Pu RL Chhuanawma, Honorary Wildlife Warden chuan a kaihruaia, ani hian Fire Prevention Week, 2019 puala Chief Minister Pu Zoramthanga thuchah  a chhiarchhuak a ni. Sub Headquarters YMA Zaipawl leh Nl Lancy Remlalhruaii ten mipuite zaiin an awi a. Pu Laltlanhlua Zathang, DFO, N. Vanlaiphai chuan lawmthu sawina hun hmangin Week hawnna inkhawm hi tihtawp a ni.

He hunah hian Serchhip SP Pu Sathyiasundaram te, District Fire Prevention Committee members te, District Officers te, tlawmngaipawl hrang hrang leh chanchinbumite, College zirlai naupang engemawzat leh sawm bik midangte an tel a ni.