Vawiin chawhma dar 11:00 khan Fisheries Department huaihawtin Serchhip Hmar Veng YMA Hall ah Serchhip District chhunga YMA Branch leh YMA Group hrang hrang zinga luidung nungcha humhalh tha te lawmman sem inkhawm buatsaih a ni a, Serchhip District bawrhsap Pi Juhi Mukherjee, IAS chuan khuallian niin he hun hi a hmanpui.

Khuallian Pi Juhi Mukherjee chuan Mizo hnam te chu Pathian thilsiam te nena inzawm bik tak hnam kan ni a a hriat thu a sawi a, luidung nungcha te humhalh chungchangah YMA te chu Mizoram tana hnukpui ber leh a hnaikaitu ber an nih thu a sawi bawk. Mizoram lui te chu India ram hmun thenkhat lui te aia thianghlim a nih thu sawiin Mizo te kan vanneih bik zia a sawi bawk. Hetiang chindan tha tak te hi Central Sorkar lamah te pawh thlena tanpuina awm thei te haichhuak turin Department mite pawh a fuih bawk a ni.

Serchhip Sub-Hqrs. YMA aiawha thusawitu Pu Kawlthuama, Vice President chuan Fisheries Deptt. in YMA te hmalakna hriatpui a lawmman semna hun pawimawh tak an buatsaih theih avanga lawmthu sawiin, nungcha te humhalh mai bakah an chenna tur tui thianghlim leh tam zawk a lo awm theih nan Ramngaw humhalh a tulzia a sawi bawk.

He hun  kaihruaitu Pi Zonuntluangi, DFDO, Serchhip chuan luidung nungcha humhalh tul zia a sawi a, zoram pum huap pawha hetiang lama hmahruaitu leh sul sutu YMA Branch, a bik takin Mualcheng Branch YMA, 1992 atanga hma lo la tawh tute Serchhip District huam chhung ami an awm chu chhuanawm a tih thu a sawi a ni.

He lawmman semna inkhawm ah hian Serchhip District chhunga  Vantawng Group YMA, Thenzawl te bakah Branch YMA pasarih(7) , Mualcheng Branch, Keitum Branch, Chhiahtlang Chanmari Branch, Serchhip P&E Veng Branch, Chhiahtlang Zotuithiang Branch, Chhiahtlang Hmar Veng Branch leh Serchhip Hmar Veng Branch te hnenah lawmman Cheng singli (Rs.40,000/-) theuh  leh Citation hlan an ni.

He inkhawm-ah hian lawmman dawngtu zing ami  Branch YMA pathum te leh Group YMA pakhat  atangin an hmalak tawh dan te report ngaihthlak a ni bawk.