3096/2022-2023

Kolasib dated 17th December 2022: A vawi khatna atan Kolasib Anglers Society ten a 'Lui a nungchate humhalh' tih thupui hmang a Tuichhuahen a '1st Kolasib Fishing Competition' an buatsaih chu Fisheries Minister Pu K.Lalrinliana'n khuallian niin a hmanpui a. Pu Casper Lalnunmawia, President, Kolasib Anglers Society chuan hun kaihruaiin Pu F.Vanlallawma, Director, Fisheries Department, Pi Lallianpuii, DFDO, Kolasib te pawh he hun ah hian an tel a ni.

Minister Pu K.Lalrinliana chuan Mizoram chu kawng hrang hrangah intodelh tur a țan lak a ngaih zia sawiin lui a nungchate uluk tak a humhalh an nih chuan nakin lawk ah lui lam sa a kan mamawh intodelhna kawng ah hma kan sawn leh zual tur thu a sawi a. Chumi tur chuan Sawrkar hnuai ah dan hrang hrang duan a nih thu te, tûr, bomb leh current hmang a lui a nungcha suat a nih țhin avanga harsatna thleng thei te sawiin uluk tak leh mumal tak a lui dung humhalh kalpui a pawimawh zia a sawi. Minister chuan zinmite hip nan leh lui sa man kawng a tui mite tan nghakuai chiah a intihhlimna huaihawt kan intihhmuh țhin chu lui a nungchate humhalh a țul zia inzirtirna hun țha tak a nih thu sawiin dil sangha intodelhna turin Pradhan Mantri Matsya Sampada Yojana kaltlangin sawrkarin hma nasa takin a lak thu a tarlang bawk a ni.

Pu F.Vanlallawma, Director, Fisheries Department pawhin thu sawiin Sangha chu sa hrisel tak a nih angin mihring hriselna atan pawh a sa thianghlim tak a nih thu a sawi a, awmze nei tak a lui a nungchate humhalhna kalpui a pawimawh thu leh chumi tur chuan Kolasib Anglers Society te pawh hma la zel turin a chah bawk a ni.

Kolasib Anglers Society buatsaih, 1st Kolasib Fishing Competition ah hian mi 

56 telin Pu Sawmzuala, Bilkhawthlir chuan darkar 5 chhungin sangha kg 13.49 manin pakhatna lawmman a dawng a ni. Kolasib Anglers Society hi June 2022 a din niin tun ah hian member 22 an awm mek a ni.