3095/2022-2023

Dated Aizawl the 17th December 2022 : Tukin khan Mizoram Amateur Taekwondo Association buatsaih World Taekwondo Black Belt Awarding Ceremony, Mizoram Rural Bank Conference Hall, Mineco Khatla-a neih chu Rural Development Minister Pu Lalruatkima'n a hmanpui.

He Black Belt hlanna inkhawmah hian Khuallian Minister Pu Lalruatkima chuan thu sawiin mi 42 in Belt an dawng thei chu a lawmawm a tih thu sawiin Taekwondo chu khawvel leh Mizo te ngaihsan a ni, a ti.

Rural Development Minister chuan Taekwondo chuan ken tel tam tak a nei a, chung zinga pawimawh em em mai chu kawng tinrenga insumtheihna leh ruihtheih thil laka fihlim a ni, a ti.

Black belt la turte hnenah chuan Taekwondo  avangin Mizoram mai ni lo, ram pawnah tawn hriat tamtak an neih phah a, chu chuan an thil hmachhawn chi hrang hrangah mahni inrintawkna a neihtir a ni, a ti bawk.

Khuallian chuan Taekwondo Academy pawimawhna sawiin zo nun zemawi, nu leh pa leh aia upa zahthiamna leh mahni inthununna te zir chhuahna hmun a ni tel a ni, a ti a. Black belt la kalkhawmte hnenah chuan an tumruhna tipuitling turin huaisenna nei turin a fuih a, Olympic level thleng thei tura hmasawn chho zel turin duhsakna hlan nghalin Mizoram timawitu an ni tih inhria a, India ram pawnah par chhuak thei turin tan an lak a ngai a ni, a ti. 

He Black Belt Award semna inkhawm hi Prof.Rualkhuma Colney, President MATA in kaihruaiin, Taekwondo Association hotute leh Martial Arts lama Mizo te zinga tawn hriat nei sawm bik te leh nu leh pa ten an telpui a. Vawiina Black belt la thar te hi an vaiin mi 42 niin; 1st Dan 32, 2nd Dan 8 leh 3rd Dan 2 te an ni.

Mizoram Amateur Taekwondo Association hi November 19, 1987 khan din tan niin Mizoram pawn leh khawvel huapin lawmman thahnem tak an la tawh a. Tuna Black Belt hmu thar te nen hian MATA chuan Black Belt 316 a nei tawh a ni .