Vawiin khan Fisheries Minister Pi Vanlalawmpuii Chawngthu chuan Lai Women Association (LWA) General Conference vawi 14-na chu Chandmary Inpui, Lawngtlaiah Khuallian niin a hmanpui a. Fisheries Secretary Pu Thlamuana MCS leh official dang te'n an tawiawm.

Pi Vanlalawmpuii Chawngthu chuan Lai hmeichhiate inkhawmpuia Khualliana sawm a ni chu inchawimawina ropui taka a ngaih thu leh lawmawm a tih thu a sawi a. Nuho inzawm khawm pawl hi a nep ngai lo va, an hma lakna pawh ram leh hnam leh khawtlangin a chhawr hle thin a ni, a ti. Hmeichhiate chu chhungkua leh khawtlang siam tha tura mawhphurhna pawimawh ber chelhtu an ni tiin, hmeichhe dinhmun chawi kan nan hmeichhia leh hmeichhia tan ruala indawm tawn a ngai, a ti a. Voh leh dawm kan tlak ni turin sawrkarin hmeichhiate hamthatna ruahmanna hrang hrang a neihte chu a tha zawnga hman thiam a tul a ni, a ti. Minister chuan mahni hma zawn theuhvah hmeichhe dinhmun beng hniamtu ni lo va, chawi sangtu nih zawk tum theuh turin LWA member kal khawmte chu a chah a. Thu a sawi zawh hian Council Veng Branch LWA te'n "Lai Hla Bu" an buatsaih chu a tlangzarh nghal a ni.

LWA General Conference ni khatna chawhma hun hi LWA General Hqtrs President Pi H. Vanlalhruaii'n a kaihruai a. BCM pastor Rev Laltanpuia Colney chuan hunserh hmangin, General Secretary, Finance Secretary leh Treasurer report te ngaihthlak a ni a. LWA branch hrang hrangin hnam lam entirin, zaipawl zai leh mal zai te ngaihthlak a ni a. Laifate zinga chawimawi tlak hmeichhe chhuanawm pali hnenah chawimawina thuziak hlan a ni bawk.

LWA General Conference hi naktuk May ni 11 thleng hian hman a ni dawn a. Vawiin chawhnu lam khan zaipawl intihsiakna hun hmangin, naktuk lam hian kum 2018-2020 chhunga LWA Gen. Hqtrs hruaitu thlan leh rorelna hun hman a ni ang.

LWA hi April ni 24, 1996 khan din a ni a. Tun dinhmunah General Hqtrs 1 hnuaiah sub-hqtrs 3 awmin, branch 65 an nei a. Member 6000 vel an awm mek a ni.

LWA General Conference chawhma hun a hmanpui zawh hian Pi Vanlalawmpuii Chawngthu chuan Lawngtlaia a department enkawl pahnih - Fisheries leh Sericulture office te a tlawh nghal a. Fisheries office-ah hian DFDO Pu LH Zirliansanga leh a thawhpuite'n lo dawngsawngin, Sericulture office-ah chuan DSO Pu R. Lalbiakthanga leh a thawhpuite'n an lo dawngsawng ve thung a. Lawngtlai District-a an department hma lak dan tlangpui lo hrilhfiahin, a hnenah hian an mamawh thenkhatte an lo thlen a ni.