4749/2024-2025
Saitual, the 21st March, 2025: Vawiin khan Saitual District Sangha Kûtpui Organising Committee (SDSKOC) buatsaih Saitual District Sangha Kûtpui 2025 chu Ṭamdilah hman a ni a. Fisheries Minister Pu Lalthansanga chu khuallian niin hun a hmanpui a, Rural Development Minister, Ṭawi bialtu MLA ni bawk, Prof. Lalnilawma chu khual zahawm niin hun a hmanpui bawk a ni.
He hunah hian Khuallian Pu Lalthansanga chuan Tamdil lo pian chhuah dan chanchin te sawiin, Mizorama dil hmingthang ber pawl Ṭamdil Saitual District-in an nei chu an vannei hle a ni, a ti. Fisheries Minister chuan department pathum- Forest, Fisheries leh Tourism department tena an enkawl Ṭamdil chu hma a lo sawn zual zel theih nan Tamdil Management Committee chu District Bawrhsap kaihhruaina hnuaiah din a ni tih a sawi a, hei hian kawng tam takah hmasawnna a thlen theih a beisei thu a sawi bawk.
Pu Lalthansanga chuan Sangha Kutpui huaihawt nachang hria District hotute fakawm a tih thu a sawi a, Ṭamdil chu khualzin hipna tha tak a ni tih sawiin, department tin te chu neitu rilru pua tha taka enkawl turin a chah a ni. Fisheries Minister chuan Sangha thar chhuah kawnga kan intodelh theih nan leh ram chereu tur venhimna kawnga hma la a, theih tawp chhuah theuh turin kalkhawmte chu a sawm bawk a ni.
Khual zahawm Prof. Lalnilawma pawhin thu sawiin, Saitual District Sangha Kûtpui buatsaihtute an fakawm hle tih a sawi a, khualzin hipna tha tak a nih a beisei thu a sawi bawk.
Minister chuan Saituala Tung ching Association ho tan Horticulture department scheme MIDH hnuaiah brush cutter 10 pek an ni tih a sawi a. Saitual District chuan Tung leh Ṭamdil chu larpui ngei se a duh thu sawiin, hemi kawngah pawh theih tawp chhuahpui a inhuam thu a sawi bawk. Prof Lalnilawma chuan kalkhawmte chu hlim taka Sangha Kût hmang turin duhsakna a hlan a ni.
Vawiin Sangha Kûtpui hawnna inkhawm hi Ṭamdil Wetland Interpretation Centre & Herbarium, Ṭamdil-ah neih a ni a, Pi Zomuansangi, DFDO, Chairman, SDSKOC chuan a kai hruai a, Pu Ngursailova Sailo, Vice Chairman, SDSKOC chuan inlawmna thu a sawi. Khuallian Fisheries Minister Pu Lalthansanga leh Khual zahawm RD Minister Prof. Lalnilawma te chuan thu sawiin, report hi Pi Deborah Lalnghakmawii, SDSKOC hnen atangin ngaihthlak a ni a, Pu K. Lalrohlua, Vice Chairman, SDSKOC chuan lawmthu sawinain hun a khar a ni. He hunah hian Pi Zonunthari, Joint Secy, Fisheries dept, Dr. Lalngura Tlau, DC, department hrang hrang hotute, SDSKOC member te leh VC member te an tel a ni.
Saitual District Sangha Kûtpui 2025 Ṭamdil-a neihah hian intihhlimna chi hrang hrang- nghakuai chiah runpui, raw phun lera sangha khai inlaksiak, zip line a uai te a tih theih a, zai rimawi te nen kalkhawm mipuite hian hun hlimawm tak an hmang a ni.
Attachment
- Loading attachment...