4750/2024-2025

Khawzawl, dated 21st March 2025: Vawiin chawhma dar 11:00 khan DC Conference Hall, Khawzawlah Pu Lalfakzuala, Addl.DC leh Project Director, DRDO ni bawk kaihhruainain Bana Kaih (Handholding) Scheme pilot phase hnuaia Khawzawl District-a thawhpui tura thlan chhuah (progress partner) mi 25 te tan orientation training buatsaih a ni.

He hunah hian Pu Lalfakzuala chuan inlawmna thu a sawi a, Khawzawl District-ah progress partner 25 lai thlan chhuah an ni chu lawmawm a tih thu a sawi. Pu Lalfakzuala chuan Bana Kaih scheme chu Sawrkar Flagship programme pawimawh tak niin tipuitling tur pawhin theih tawp sawrkarin a chhuah zel a ni tih a sawi a, a hlawhtlinna chu progress partner teah a innghat thui hle dawn a ni tih sawiin rinawm leh taima taka thawk turin a chah a ni.

Pu Lalfakzuala chuan line department te chu kaih chhuah tur thlan kawngah fimkhur turin a chah a, mi dik leh rinawm thlang chhuak ngei turin a fuih nghal a, kalkhawmte chu training hlawk thlak tak nei turin duhsakna a hlan a, zawhna an neih ang te zawt hreh lo turin a chah bawk a ni.

Orientation training-ah hian mi 25 te chu hetiang hian line hrang hrang atan thlan chhuah an ni: Agriculture - 1, AH & Vety - 7, Horticulture - 10, UD&PA – 2, Fisheries - 3 leh Tourism - 2 te an ni.

He hunah hian Pu Paul Rokima, Sub-Deputy Commissioner in Bana Kaih Scheme hrilhfiahna hun a a hmang a, he mi hnu hian SBI, MRB, MCAB Khawzawl Branch Manager theuh ten Banking-Loans Details and Process tih hmangin zirtirna an pe a. Pu R. Lalrinpuia, Rural Accounts Officer, DRDO chuan Accounting, Book Keeping, Day Book chungchangah zirtirna a pe a ni.