4751/2024-2025

Lunglei, 2025 Vau thla ni 21: Vawiin khan Lunglei District Level Committee on PM Surya Ghar: Muft Bijli Yojana (Rooftop Solar) Scheme chu an Chairman, District Bawrhsap Pi Navneet Mann hovin a hna thawh pindanah an ṭhu khawm a. Lunglei District chhunga PM Surya Ghar Scheme hnuaia hma lak dan tur hrang hrang an sawi ho.

He hunah hian Additional DC, Power & Electricity Department SE leh EE, DIPRO, Sub-Headquarters YMA leh General Headquarters MUP ai awhte an tel a. Lunglei District mipui tam zawkin PM Surya Ghar Scheme hi an chhawr theihna tura darh zau zawka puanzar dan tur te, block level committee din chungchang leh sawrkar building-a rooftop solar vuah tur chungchang te, model solar village atana hma lak dan tur te sawi ho a ni.

He Rooftop Solar Scheme hi India Prime Minister Pu Narendra Modi chuan February ni 29, 2024 khan tlangzarhin, chenna in chunga ni tha chakna khawl khawm (rooftop solar) hmanga kawlphetha (power) tam zawk thar chhuahna tur leh mimal in (residential building) te'n an kawlphetha mamawh an thar chhuah theihna tura ruahman a ni a. Sawrkar laipui chuan mimal chenna ina rooftop solar (RTS) vuah duhte tan kilowatt (kW) 3 thleng subsidy peksak theiin, kW 1-na leh kW 2-naah ₹ 30,000 ve ve leh kW 3-naah ₹ 18,000, a vaiin kW 3-ah ₹ 78,000/- subsidy a pe thei a. Central subsidy belhchhah nan hian Mizoram sawrkar chuan RTS kW 1 zelah subsidy ₹ 12,000/- pe thei bawkin, kW 10 thlengin subsidy hi pek theih a ni dawn a. He scheme chhawr duh, a tira senso tur sum lu nei lo tan pawh a pung (interest) hniam tein bank loan lak theih tura ruahman a ni bawk.

Mizoramah chuan Power & Electricity Department (DISCOM) chu State Implementing Agency atan Central Ministry-in a ruat a. Sawrkarin tehfung hrang hrang pal tlang empanelled vendor a thlante hmangin mimal diltute hnenah RTS installation hi tihsak tur niin, tunah hian Mizoram bikah empanelled vendor 14 an awm mek a. Chenna ina vuah, RTS aṭanga energy siam chhuahte hi in neitute hman bak chu sawrkarin unit khat ₹ 4.80 zelin a lei letsak dawn bawk a ni.

Vawiina Lunglei District Level Committee ṭhut khawmah hian Lunglei District chhungah a tam thei ang berin PM Surya Ghar Scheme aṭanga hamṭhatna awmte an chhawr theih nan leh diltu tam zawk an awm theih nan ṭan lak ni se, tih a ni a. P&E Department-in bookmark leh pamphlet an siam mek thu leh electric bill sem ruala in tina sem tum a nih thu ngaihthlak niin, hemi bakah hian digital flyer siam leh theh darh te, tlawmngai pawlte hnenah scheme chungchang puanzarna kawnga hma lakpui tura ngenna siam te, VC/LC tlangau hmanga puanzar te, YMA inkhawmpui leh branch chanchinbu kal tlanga inzirtirna theh darh te rel a ni a. P&E office-ah help desk ruahman ni se, tih a ni bawk.

PM Surya Ghar hnuaiah hian mimal chenna ina RTS vuah turin Mizoramah kum 3 chhung (2024-2027) atan target 9,510 ruahman a ni a. NEEPCO kal tlangin sawrkar building-a RTS vuah tura hma lakna kalpui mek ni bawkin, RTS vuahna tur hian sawrkar building 800 thlan niin, chumi zinga 425 chu 1st Phase-a hma lakna atan ruahman leh dil mek a ni.