3894/2022-2023

Kolasib dated 20th March 2023: Vawiin chawhma khan Pu K.Lalrinliana, Minister, Fisheries Department chuan SEDP Pilot Project hnuai a Dumluia 'Chakai Demonstration Farm' kalpui chu a tlawh a. He hun ah hian Pu Laldawngliana, Secretary, Pu F.Vanlallawma, Director leh Fisheries Department-a thawktute an tel a ni.

Minister Pu K.Lalrinliana chuan lui sa zinga mizote ngaih hlut leh ngainat tak chakai chu thianghlim leh hnianghnar zawk tharchhuah a nih theih nan SEDP Pilot Project hnuai ah Chakai Demonstration Farm chu kalpui a nih thu sawiin he enchhinna hi a hlawhtlin chuan lui dung a nungchate humhalh nana hmanraw tangkai tak a nih dawn bak ah Chakai farm siam chu eizawnna tlaka a hman theih tur thu a sawi bawk a ni. Vawiina Dumluia Chakai Demonstration Farm tlawhna ah hian chakai dah luh zingah no pai mek hmuh a ni a, Minister chuan heng chakai note te hi hlawhtling taka enkawl chhoh an nih chuan Chakai Demonstration Farm hnuai a hmalakna chu hlawhtling thawkhat ah a ngaih theih thu a sawi bawk a ni. Chakai Farm enchhinna kalpuina chuan hlawhtlinna nasa zawk a hmuh zel theih nan a viltu department leh a hmun enkawltute chuan tihtak zetna nen theihtawp chhuah a thawk zel turin Minister chuan a chah a, he enchhinna hi a hlawhtlin chuan ei leh bar intodelhna kawng a mel lung pawimawh tak a nih tur thu a sawi bawk a ni.

Chakai Demonstration Farm hi DFDO, Kolasib tarlan danin enchhina leh zirchianna a nih angin a tum ber chu Cemented pond/tanks-ah chakai vulh theih dan te, an inthlahpun dan, an than dan leh dam leh hrisel tak a vulh an nih theih nana an thil mamawh hrang hrang zirchianna atan a kalpui a nih thu tarlan a ni a. June leh August, 2021 inkar ah leh March 2022 khan hmun hrang hrang atanga chakai lakkhawmte dah luh niin Fisheries Department leh ICAR-a mithiamten a huhoa endiknate an lo nei tawh a ni.