3895/2022-2023

Aizawl, the 20th March 2023: Governor Hari Babu Kambhampati chuan vawiin khan Raj Bhavan-ah Power & Electricity Department hotute a kawm a. He hunah hian tuiluang chakna hmanga Kawlphetha tam tham zawk Mizorama siam chhuah dan tur chungchang an sawiho a ni.

P&E official te hi Pu H. Lalengmawia, Commissioner & Secretary chuan a rawn ho a. Pu Lalduhawma, Joint Secretary, Pu JH Malsawma, SE(Planning) leh Pu Daniela EE(Civil) te chuan Commissioner & Secretary hi PowerPoint Presentation a pekah an pui a ni. P&ED tena an siam zawh tawh leh an kawl mek, DPR 5 chungchangah PowerPoint presentation pek hmasak a ni a. Project dang 4 - investigation kalpui mekah te pawh presentation pek a ni bawk.

Governor Hari Babu Kambhampati chuan tunhnaiah Mizorama luiluang khuah theih hmanga Kawlphetha siamchhuah chungchang chu Prime Minister Narendra Modi a sawipui tih a sawi a. Prime Minister chuan he thil hi tha takin a lo ngaihthlak sak thu leh state level-ah lo enfiah hmasak a nih hnuah a tul dan azira hmalak tha a tih thu a sawi a ni. Governor chuan Mizoram chhungah Kawlphetha siamchhuah tur tam tak awm mek chu hman tangkai thuai ni se tha a tih thu te sawiin P&E hotute chu thil awm zia a zawt hmasa a.

Governor chuan DPR siam sa awm mek te chu tha thawkhat nia a ngaih thu sawiin Ministry of Power te sawipui hmasa phawt turin P&E hotute chu thurawn a pe a. Hemi hnuaah hian DPR neih sa te chu Prime Minister Office(PMO) ah Power Secretary leh a thawhpui ten presentation tha taka siamin thehlut se tha a tih thu a sawi a ni. Governor chuan Kawlphetha siamchhuahna atana power plant siam nan sum tam tham hman a ngaih avangin Central PSU Lian zawk te pawh thawhpui dan zawng turin P&E hotute chu thurawn a pe bawk a ni.

P&E hotuten PowerPoint presentation an pek dan chuan tunah hian DPR siam zawh vek tawh 5 a awm mek a. Heng te hi - Kolodyne -II HEP(460 Mw), Tuival HEP(210 Mw), Bairabi Dam Project(80Mw), Tuirini HEP(24 Mw) leh Tuivawl HEP(24 Mw) te an ni a. Project 4 dang pawh kalpui theih a ni em tih enfiah mek a ni bawk. Chung te chu - Tuipui HEP, Tuichang HEP, Mat Sekawi HEP, leh Tlawng HEP te an ni.

Tunah hian Mizoram state in Kawlphetha a mamawh zat atanga tam tam tak chu state pawn lam atanga lei mek a ni. Heng power plant - AGBPP(NEEPCO), AGTCCP(NEEPCO), Baramura -IV(TPGL), Baramura -V(TPGL), leh Palatana plants atang te hian kum tin Rs 400 crore(approx) sengin Kawlphetha lei thin a ni.

Vawina meeting-ah hian Nizung chakna hmanga Kawlphetha siamchhuah belh theih dan te pawh sawiho a ni bawk.