808/2022-2023
Aizawl, 7th June, 2022 : Vawiin khan Fisheries Minister Pu K Lalrinliana hovin PMMSY (Pradhan Mantri Matsya Sampada Yogana) 2020-2021 hnuaia hmalakna te thlirhona neih a ni a. He scheme hnuai a sangha dil tanpuina te bakah a no khawinate, sanga chi siamna hatchery, vur khawl siamna ice plant, sangha zawrhna kiosks, leilet buh nen a sangha khawina leh sangha mawi (ornamental fish) khawina leh siamna tanpuina te pek chhuah a ni.

Vawiina Minister hova thukhawm chuan he scheme hnuaia hmalakna kal mekah beneficiary (tanpuina dawngtu) hna thawk tha lo te chu installment pek hmabak turte hren rih a, insawifiahna ‘show cause notice’ pek ni se an ti a , chu bakah Fisheries Department Secretary kaihhruaina hnuaiah Monitoring Cell din a, a remchang dan apiangah PMMSY hnuaia hmalakna te a hmunah tlawh zel ni se an ti a ni.

PMMSY 2021 -22 hnuaia hmalakna tur te thlir ho a ni bawk a, vawiina thukhawmte hian Ornamental Fish Rearing Unit pathum Aizawla din tawh te chu a hmunah tlawh nghal a. Medium Scale Ornamental Fish Rearing Unit , Lalrinpuii Chaltlang Salem Veng Zo Aquatics neitute hmunhma tlawh hmasak ber a ni a, anni hi sawrkarin cheng nuai 4.8 in a tanpui a, hei bakah hian beneficary share (a dawngtute thawhzat) hi cheng nuai 3.2 a ni, sawrkar atanga tanpuina an hmuh hi 1st installement 70% pek chhuah tawh a ni.

Heng bakah hian Backyard Ornamental Fish Rearing Unit siamna pahnih Zemabawkah leh Armed Vengah te tlawh a ni bawk ,tanpuina dawngtute chu Maggie L Ralte leh Lalhmunmawia te niin , anni hi sawrkar in cheng nuai 1.8 in a tanpui a, cheng nuai 1.2 dang chu a dawngtute thawh tur a ni, anni pawh hi 1st installemnt 70% pek chhuah an ni tawh a ni.

Vawiina Fisheries Minister hova heng hmalakna tawlh tute chuan an hmuh chinah tha an ti hle a, an hmalakna te fakawm an ti a, midangte tan pawha entawn tlaka hma la zel turin an fuih a, PMMSY scheme hnuaiah Ornamental Fish Rearing (Sangha mawi khawi) hi tun ai a tam zawk leh darh zau zawk a hmalak tha an ti a ni.