807/2022-2023
Dated Serchhip, the 7th June, 2022: Serchhip District a khawpuia mirethei Insak tanpuina PMAY(U) dawngtu tur thlifimtu, Serchhip District Screening Committee under PMAY, HFA (Urban) chu vawiin khan DC' s Meeting Hall ah an chairman leh District Bawrhsap Pi Nazuk Kumar, IAS hovin an thukhawm a, Deputy Speaker Er. Lalrinawma, Tuikum AC bialtu MLA pawh member anih angin a tel.

PMAY (u) HFA 2nd DPR ah hian Serchhip atangin mi 985 te chu insak tanpuina dawng tur hian thlan chhuah an ni phawt a, heta tang hian mi 14 te chu chhan hrang hrang avangin paih an ni a, a hma deuh khan mi 34 te chu paih an lo ni tawh bawk. Tin, Thenzawl ah 2nd DPR atanga insak tanpuina dawng tur hi mi 296 thlanchhuah an ni bawk a, heng zinga mi 1 chu paih a ni bawk. Vawiin meeting ah hian Serchhip leh Thenzawl atanga paih leh takte chungchang hi thlir hovin, paih leh rih an nih tak chhan chungchang te ngaihthlak a nih hnuah lungrual takin an pawm tlang a ni. Tin, Beneficiary Led Construction (Insakna loan pung tlem chi) dawngtu turte pawh vawiin hian an ngaihtuah ho bawk.

2nd DPR a PMAY (U) dawngtu turte tan hian March ni 24 atanga 28 khan DC Conference hall leh Ramlai Community Hall Chhiahtlang ah te Scheme chungchang a inhmelhriattirna leh hmalak dan turte inhrilhhriatna hun hman a lo ni tawh a, inkaihhruaina awmsaah chuan insak tanpuina dawng turte hi vawi thum instalment a pawisa pek tur an ni ang a, 1st instalment ah cheng singruk, 2nd leh 3rd Instalment ah cheng singthum ve ve pek an ni dawn a ni.

He Screening Committee ah hian Bawrhsap chu Chairman niin District Urban Development Officer (DUDO) chu Member Secretary a ni a, District chhunga MLA te bakah Addl. DC, SDO(S), SDO(C Thenzawl & N. Vanlaiphai, Settlement Officer, Lead Bank Manager, Serchhip Joint VC Chairman, Thenzawl Joint VC Chairman leh North Vanlaiphai te chu member an ni.