Former Legislators’ Association of Mizoram (FLAM)  chuan vawiin nileng khan I&PR Auditorium-ah General Body Meeting neiin chawhma hunah 2008 MLA inthlana thlan tlin tak an member 7 MLA tharte lawmpuina hun an hmang a, an member boralta te sunna an nei bawk. Assembly Speaker Pu R. Romawia leh Education Minister Pu Lalsawta ten Khuallian chan changin chawhma hun hi an telpui a ni.

 

 

FLAM Vice-President Dr. Kenneth Chawngliana kaihhruai inkhawmah hian Khuallian Assembly Speaker Pu Romawia chuan FLAM member te hamthatna tur leh an hmakhua zawnga Assembly Speaker kal ta ten theihtawp an lo chhuah thin thuah lawmthu a sawi a. Tuna Speaker dinhmuna a din ve takah pawh hian chungte chu a theih anga chhunzawm a tum tur thu leh hriselna kawngah phei chuan sorkar laipui leh state sorkar duhsakna beisei chunga MLA hlui tawh te tana hamthatna haichhuahpui a tum tur thu a sawi. Mizoram politics kalsual thei tur ven kawnga FLAM ten rawtna leh thurawn tha tak tak an thawh thin te chu a takin a hlawhtlinna kan hmu zel a ni tiin MLA inthlanpui hnuhnung bera MPF hmalakna te pawh kha FLAM thawhrah zinga mi a ni a ti a. Chuvangin MLA lo ni ve tawh thin te chuan ram siamna kawngah tih theih an neih ve apiang te chu tha thlah lova chhunzawm hram hram thin turin a chah a ni.

Khualzahawm Education Minister Pu Lalsawta chuan Zoram siamthatna tur kawngah hian pawl bik nihna thinlung dah bova lungrual taka thawhho a hun tak zet tawh a ni, a ti a. Education siamthat chu sorkar thar thil tum pawimawh hmasa a nih avangin FLAM member te hnenah Education Reform atana thurawn leh rawtna thawh turin a sawm bawk.

 

Art & Culture Minister Pu P.C.Zoramsangliana pawhin he hunah hian thuchah tawi a sawi bawk.

Vawiina FLAM General Body Meeting hian Resolution - “Assembly Term khat chhunga Best Legislator thlan thin ni rawh se” tih an siam a. An pawl chungchang kal zel dan tur leh thil pawimawh hrang hrangah sawihona hun tha tak chawhnu lamah an hmang a. Hruaitu thar an thlang a, chungte chu -

    President        :    Pu K.L.Rochama
    Vice President    :    Dr. Kenneth Chawngliana
    Treasurer        :    Pu C.L.Ruala

te an ni.

Former Legislators’ Association of Mizoram (FLAM) hi kum 1994 October thla khan MLA hlui 29 kalkhawmin an din a ni a. Mipui thlan MDC, MLA, MP lo ni tawhte intelkhawmna pawl niin National Ex-MLA Council ah member a ni a. 2008 MLA inthlan hnuah hian member thar 25 zet an neih belh dawn a ni.