Vawiin chawhma khan New Secretariat Conference Hall-ah Finance Minister Pu Lalsawta'n National Workshop on Utilization of Bamboo as Building Material in NE Region chu a hawng a. He hunah hian hmarchhak biala insakna hmanrua atana Mau hman tangkai chungchangah mithiamte an inrawnkhawm a ni.

National Workshop on Bamboo Utilization hawngtu, Finance Minister Pu Lalsawta chuan, " Mau kan nei tih kan hria a, kan ngah hle tih pawh kan hmu vek a; hlawkpuina na tham a ni tih pawh kan hria a ni . Mahse a hmalatuten hunrei an lo kalpui tawh atang hian mau hmanga hauhsak kan tumna kha chu tuna kan thlen chin hian a la pha lo hle a. India rampum huap Seminar, Mau chungchanga mithiam ber ber fuankhawmna, Mizoramin kan thleng hi - a state ang pawhin kan vanneih pui ngei ka beisei a ni", a ti. Mau chidang phunbelh aiin Mizorama  mau chi hrang hrang awm mek te hman tangkai dan zawn hmasak chu a kawng hmang dik zawk nia a rin thu a sawi a. Finance Minister chuan Bamboo Project siam a nih leh dawn chuan te tak te te - Fragmented Projects chu siam ni tawh lo se tih sawrkarin a duh tih a sawi a. Mizoram ang state te zawk te tan chuan Project te sep tam tak aiin Project liantham pahnih khat a tangkai zawk a ni a ti.         

National Workshop on Bamboo Utilization hi Central Building Research Institute, Roorke( CSIR - CBRI) huaihawt niin a senso hi Ministry of DoNER, North Easter Council(NEC) leh Science & Technology  Intervention in North East Region(STINER) te tangkawp in an tum thung a ni.  Workshop hawnna hun hi Addl. PCCF Dr.K. Kire in a kaihruaia hawnna hun chhungah hian Pu SN Pradhan, JS, MoDONeR, Dr. N. Gopalakrishnan, Director, CBRI leh Pi Mercy Epao, Director, MoDONER ten thusawina hun an nei a. Zirhona hun hi hun 9 neih a ni a. Heng hunah te hian mithiamten  inzirtirna leh inkawhhmuhna lam hawiin thusawi leh Power Point Presentation pekna hun an hmang a ni.  NEC Secretary Pu Ram Muivah hne  atangin Utilization of Bamboo in NE Region, Pu BB Singh, Director, Bamboo Mission, Madhya Pradesh hnen atangin Selection of Bamboo for Construction, Dr Suvir Singh hnen atangin Fire Treatment of Bamboo, MoDoNER Secretary Pu Naveen Verma hnen atangin Mau hman tangkai tumna kawnga hmalakna kalpui theih dan te, Dr PK Das hnen atangin Bamboo in Building Structures, Pi Pushpanjali Das hnen atangin Structure Use of Bamboo, Pi AR Neelam hnen atangin Symphony of the Bamboos leh Sikkim Bamboo Mission hnen atangin NEIST-Jorhat  a Research & Development in Bamboo chungchanga zirtirna te ngaihthlak leh dawnsawn a ni a. Technical Session pakhat tawp chu sawihona leh hmalam huna hmalak chhoh dantur rel nan hman a ni bawk a ni.

National Workshop on Bamboo Utilization a mithiamte sawi dan chuan India ram chhungah Mau leh Rua, a huhova lam nan Mau(Bamboo) tia sawi, chi hrang hrang 125 vel zet a awm a; North East Region-ah Mau chi hrang hrang  50 bawr vel a awm a, Mizoramah chuan Mau chi hrang hrang 25 bawr vel a awm a ni. Mizoram hi a zim naa, a zau zawnga chhuta Mau chi hrang hrang awm tamna leh that duhna ber, a state pumpui hmun thuma thena hmun hnih a nih avangin " Bamboo State" tia vuah a ni. Mithiam te chuan tlo zawk tura sawngbawl, Mau thah(Treated Bamboo) chu kum 50 vel thleng chhe lo tura ngaih a ni tih an sawi a. Mau thahloh( Untreated Bamboo) erawh kum 4 vel bak hman tlak a ni lo thung a. Mau chu Kahpathir tluk zeta khawng, insakna atan pawh Cement,Balu leh Rawra te nena chawhpawlha Concrete Structure siamna atan hman theih a nih thu sawi a ni. Mithiam te chuan Environment humhalh na atan leh lirnghing laka a him zawk avang te leh kahpathir tluk zeta a tlo tho a vangin Engineer leh Architect te pawn Mau hmanrua hman uar zawk a nih theih nan ngaihtuahna seng se tha an tih thu an sawi a. Ram hruaitu leh sumdawnglian te pawn an ngaihven a ngai a ni an ti.

National Workshop on Bamboo Utilization hian sawrkar lam atangin PWD Engineer te, EF&CC Official te, Mizoram Architect pawl hruaitute, Sumdawng te, University lam mithiam te bakah India ram hmun hrang hrang atanga mithiam lo kal khawm te an fuan khawm a. He hun hi naktuk a World Bamboo Day puala inpuahchah lawkna programme pakhat a ni.