Vawiin nileng khan Federation of Mizoram Government Employees and Workers (FMGE&W)-te chuan Vanapa Hall-ah General Conference vawi-30na an hmang a. Finance Minister Pu Lalsawta chu khuallian a ni.

Pu Lalsawta  chuan FMGE&W chu ram mipuite tana hnathawk tur leh ram innghahna ni tura pawl din leh intelkhawm an ni, a ti a. Ram hnuk khawihtu tak takte an nih avangin sawrkarin a ngai pawimawh a, an rawtna siamte leh harsatna an thlen pawh a theih chin chinah a chinfel sak thin, a ti. Sawrkar hmalakna tipuitlingtu pawimawh an nih avangin NLUP hmanga sawrkarin mi rethei khaichhuah a tumnaah leh hmalakna thar NEDP ah pawh sawrkar kut ke ber an ni a, an tellovin a hlawhtling thei lo, a ti a. Tang puihna tia sawi thin NEDP hmang hian hlawhtlin tuma tangte hnenah mamawh liantham - khawl te, cold storage te, kawng leh thil dangte lamkhawm sakin kuthnathawktute thar chhuah suma chantir turin sawrkar chuan market economy-ah a ngaihna hriate hruailuh a tum a ni, Finance Minister chuan a ti. Economic policy chauh ni lovin social policy a nih tel dan sawiin Pu Lalsawta chuan NEDP hian sum leh eibar thar chhuahna kawng chauh ni lovin khawtlang nun tibuaitu, thalai tlawngawl, tih tur hrelo ten ruihtheihthil tih an chin fo pawh hi a hnawtkiang thei dawn niin a sawi a. 7th Pay chungchangah Finance Minister chuan sawrkar hnathawkte pek ngei an nih tur thu leh a hun erawh chiang taka sawi theih a la nih loh thu a sawi bawk.

FMGE&W President Pu Ramhmangaiha Ralte pawhin thu sawiin an pawl chu sawrkar department hrang hranga thawk, mamawh leh harsatna inang lo tak tak an ni nachungin sawrkar leh ram that tlanna tur, an zavaia mamawh inang thil tam tak a awm avangin inhlawmkhawm thiam a pawimawh, a ti a. Sawrkar hnathawk te chu mahni hna theuh rinawm taka an thawh hian Mizoram hi ram nuamah an siam thei tih sawiin hna-ah te lua leh lian lua a awm lova, zavaia thawhhona tha a pawimawh a ni, a ti.

FMGE&W General Conference vawi - 30na hi session hniha then niin chawhma lam  hi Senior Vice President Pu K.Lalsawmvela’n a kaihruai a. Chawhnu inkhawm hi an President Pu Ramhmangaiha Ralte chuan kaihruaiin rorel inkhawm neih a nih bakah hruaitu thar thlanna hun an hmang a ni.