Nimin chawhnu khan Lunglei District Additional DC Pu Benjamin Lalzama kaihhruaiin a office chamber-ah District Task Force for Immunization an thukhawm. Meeting-ah hian Health Department hotute bakah Education Department, Social Welfare Department, I&PR Department leh YMA, MHIP hotute an tel a ni. Meeting-ah hian  Intensified Pulse Polio Immunization (IPPI)  1st Round , Intensified Mission Indradanush (IMI) Phase 1, Round 4 January thla chhunga kalpui thlirletna leh  Measles Rubella (MR)  Vaccination Campaign neih tur inpuahchahna sawiho a ni. 

Heng hridanna hrang hrang pek chhuah kawnga Lunglei District chhunga hmalak dan tlangpui Dr Lalrinthangi, District Immunization Officer, Lunglei chuan report a pe a. Zenghri danna Intensified Pulse Polio Immunization (IPPI)  1st Round chu January ni 30, 2018 khan zawhfel niin Center 15 hnuaiah naupang kum 5 hnuailam target 14,168 neihah zaa za pek an ni. Heng Center 15 vekah hian March ni 13, 2018 hian Intensified Pulse Polio Immunization (IPPI) 2nd Round nei turin ruahmanna siam mek niin naupang kum 5 hnuailam target 14,438 leh an ni ang.

Intensified Mission Indradhanush (IMI) Phase-1, Round 4 ah Sawrkar laipui ruahmanna siam angin naupang kum hnih hnuailam leh nu nau pai te hnenah a huamzau thei ang berin hri danna pek chhunzawm zel an ni a. Intensified Mission Indradhanush (IMI) hnuaiah hian Tlabung SDH, Bunghmun PHC leh Lunglei North MC huamchhunga khaw 12 ah March thla chhung hian Additional Round neih leh a ni ang.

Measles Rubella (MR)  Vaccination Campaign neih turah pawh Lunglei District Micro Plan duan chhuah tawh niin khaw 197 ah naupang thla 9 atanga kum 15 chin target 46,268 neih a ni. Block Level-ah ASHA, Anganwadi leh Health Worker te training pek tawh an ni a, Education Department nen tangkawpin zirtirtu te training pe thuai turin ruahmanna siam mek a ni bawk.