Vawiin chawhma khan Tourist Lodge Chaltlangah Mizoram AYUSH Doctors’ Association (MADA) chuan 13th General Conference an hmang a. He hunah hian Health Minister Pu Lal Thanzara chu Khuallian a ni.
Khuallian Pu Lal Thanzara chuan thu sawiin AYUSH hnuaia Ayurveda, Yoga, Unnani leh Siddha-te hi India ram chhulchhuak an ni a, hemi hnuaia inenkawlnate hi a hautak loh avangin mi harsa leh rethei zawkte ban phak a nih bakah a thlawna damdawi sem a ni te hi damlo tan malsawmna a ni, a ti a. AYUSH thatna hi kan hre chho mek zel a, district hospital zawng zawng ah AYUSH OPD changtlung tak kan nei a, CHC leh PHC thenkhatah pawh AYUSH Medical Officer-te dah an ni a, PHC thenkhatah phei chuan AYUSH Medical Officer chiah awmna a awm a ni, a ti a. Hmun kilkhawr leh pan harsa tak takah pawh AYUSH Doctor-te an awm chu fakawm a tih thu a sawi a. Nikum November thlaa Central Council for Research in Homoeopathy hotupa ber Director General Dr. Raj K. Manchanda chuan Mizoram a rawn tlawh khan AYUSH hmasawnna tur te, Aizawl Civil Hospital-a an Council enkawl, Clinical Research Unit chu Regional Research Unit-a hlankai dan tur te sawiho a nih thu a tarlang a. Minister chuan hmarchhaka a hmasa ber kum 2016 a hawn Integrated AYUSH Hospital, Thenzawl chu mipuiin an chhawr tangkai thu sawiin AYUSH Doctorte chu neitu an nih angin theihtawp chhuah turin a fuih a. OPD-a mi harsa tak tak inentir tura lo kal te chu uluk taka lo en a, lo ngaihven thin turin a chah a. Conference hlawhtling tak nei turin duhsakna a hlan bawk a ni.
Mizoram AYUSH Doctors’ Association (MADA) hi kum 2004 khan din niin Mizoram Homoeopathic Doctors’ Association tih hminga din a ni a. Kum 2009 khan Homoeopathy leh Ayurvedic doctorte infinkhawmin Mizoram AYUSH Doctors’ Association (MADA) tiin hming thlak a ni a, tun dinhmunah hian member 169 an awm mek a ni.
MADA President Dr. C. Vanlalhlimpuia chuan kalkhawmte lawmna thu sawiin programme a kaihruai a. MADA General Secretary Dr. Lalkhawngaihi Renthlei atangin report ngaihthlak a ni a. MADA Senior Adviser Dr. C. Lallunghnema chuan fuihna thu sawiin hun a khar a. Chawhnu lamah kum 2018-2020 chhunga MADA Office Bearers-te thlanna hun leh inpawlhona hun neih a ni bawk ang.
