Vawiin hian Serchhip Bazarah Horticulture Department leh  Agri & Horti Co-operative Society tangkawpten an buatsaih Thlai Thar Kut hman a ni a. A hawnna inkhawm tawi, Bazar Hall ah neih ah Dr. Elizabeth Saipari, Director, Horticulture Department chu khuallian a ni. 

A hawnna inkhawm tawi, Pi M. Vanlalzami, Serchhip DHO kaihhruaiah hian Dr. Saipari chuan, Serchhip chu hun rei taka tang tawha chawhmeh thlai tharchhuak tam thin khua a nih avangin Mizoram tan dinhmun pawimawh tak an luah reng tih sawiin, an thlai tharchhuah ten hma an sawn deuh deuh zel chu fak an phu a ni, a ti a. Horticulture Department pawh heng thlai chingtute tan hian a inhawng em em a,an tan theihtawp kan chhuah zel dawn a ni, a ti. Chawhmeh/ thlai chingtute leh huan siam tute chu Department mithiamte rawn thin tur leh mithiam zawkte thurawn anga an thlaite enkawl thin tura chahin, vawiinah pawh an tan Plant Health Clinic hawn a nih thu a sawi a. Entawn tlaka hna lo thawk zel turin kalkhawmte a chah a ni. 

He hunah hian Serchhip Agri & Horti Society Chairman, Pu Pc. Lalsiamliana pawhin thusawiin Serchhip thlai chingtute leh Horticulture Department te an thawhho tirh ata vawiin thlengin hnungtawlh zawnga an kal ngai loh thu sawiin, tun hnai maiah pawh Horticulture Department hmalakna zar zovin hmanrua tha tak tak an neih belh thu a sawi a. Thlai chi pawh tun hnaiah chuan an indaih khawp an hmuh theih fo tawh thu leh sawrkar in a tanpuina zawng zawngah te an lawmthu a sawi bawk.

He inkhawmah hian Pu K. Lalduhawma, Jt. Director, Horticulture pawhin thusawina hun hmangin, Zaithiamte leh fiamthu thiamten hun an hmang bawk a, Pi Lucy Zaithangpuii, HDO chuan lawmthu sawiin a khar a ni. 

Hemi hnu hian thlai chingtute thlai thar chi hrang hrang Serchhip Bazar tual leh kawngpui kama stall hmanga an phochhuah chi hrang hrangte chu mipuite tan hawn a ni a. Thlai thar entu leh anmahni dawr tuma kal mipui an thahnem hle a ni. Vawiina thlai phochhuah te hi man tlawm zawk (a hmun rate) a hralhchhuah nghal an ni. 

Serchhip Agri & Horti Society ah hian tunah chhungkaw 200 chuang an inziaklut tawh a, tun hnaiah TATA Trust NEIDA ten Tractor pahnih leh leilehna hmanrua pein, Cooperations lamin Truck lian leina Loana an pe a. Tin, an thlai chinna hmun Zawlpui tlawhtute tana chawlhbuk pahnih, pakhat Horticulture Department sak leh a dang anmahni Society sak a awm thar bawk. Society hian kumtin thlasik thlai chin dawnah an memberte hnenah bul tanna tur Loan an pukin an insemdarh thin a, an thlaite an thar rualin an rul ve leh mai thin. Tun season ah pawh hian hetiang atan hian Rs. 7 lakh zet an puk  a, a tlangpuiin a tharchhuak tlem pawlin hapta tin Rs. 4000-5000 man an tharchhuak a, a thar tha pawlin hapta tin Rs. 20000 man vel an tharchhuak thei thin a ni.