Pachhunga University College chuan vawiin (9 March, 2018) hian an College Multipurpose Hall-ah Cultural Day ropui takin an hmang a, Mizoram University Vice Chancellor, Prof. K.R.S. Sambasiva Rao chuan khuallian niin a hmanpui.
Pachhunga University College hian kum thum danah College Cultural Day hi an hmang thin a, vawiina Cultural Day an hman ni a vawi thumna niin programme chi hrang hrang an buatsaih a ni. A programme pui ber Multipurpose Hall-a hmanah hian zirlai ten khawvel hnam hrang hrang inchei dan an lantir a, hnam hrang hrang zai leh hla te sak a ni bawk. Tunlai zaithiam lar Lalduhsaki te, Hlimhlimi te, Cindy te leh midang dangin kalkhawmte zaiin an awi a ni.
He Cultural Day-ah hian PU College Principal Dr. Tawnenga chuan, Cultural Day-in a tum ber chu khawvel hnam hrang hrang culture lantir a nih rualin, Mizo hnam culture, incheina leh zai leh lam te entir a, vawnnuna, chawilar a nih thu a sawi.
Khuallian K.R.S. Sambasiva Rao, Mizoram University Vice Chancellor chuan, Pachhunga University College-in hnam hrang hrang huapa Cultural Day an buatsaih chu lawmawm a tih thu a sawi a. Mizoram chu ram nuam tak a nih bakah culture, hnam incheina, zai leh lama hausa tak nia a hriat thu sawiin, ‘He cultural day hian hnam hrang hrang inkarah inunauna tha thlen sela, zirna kawngah pawh hmasawnna thlen se ka duh a ni,” a ti bawk.
Pachhunga University College Cultural Day-ah hian Aizawl-a restaurant leh hotel hrang hrang ten ‘Food Stall’ an buatsaih a, Mizo ei leh in chi hrang hrang bakah hnam hrang hrang ei leh in chu lei theihin an zuar chhuak a. Mizoram sorkar, Art & Culture Department-in Mizo hnam incheina leh hmanraw chi hrang hrang phochhuahna (exhibition) an buatsaih bakah Centre for Peace and Development (CPD) ten an thil siamchhuah chi hrang hrang an phochhuak bawk.
Cultural Day-ah hian thu leh hla hmanga Mizo hnam inpumkhatna atana thawhhlawk hnenah ‘Laisuih Award’ pek thin a ni a. Kuminah hian Lalnunsanga (T Melody) Tahan, Myanmar hnenah he ‘Laisuih Award 2018’ hi an hlan bawk a ni.
Cultural day chawhnu lamah hian tunlaia zaithiam lar hrang hrang - Feli Fanai, Tlangromawia, Lalrinhlu Tlumang, Kimkima Chhangte, Cindy Lalthanpuii, Hlimhlimi, Lalduhsaki leh midang ten zirlai leh kalkhawmte zaiin an awi leh bawk.
Pachhunga University College-ah hian zirlai 2000 chuang leh zirtirtu 120 vel an awm mek a, Department hrang hrang 21 awmin, 2018 July thla atang hian Life Science, Philosophy leh Mizo subject-ah Post Graduate (PG) zir theihna an hawng dawn bawk a ni.
